Zhurnalistlarni qoghdash komitéti "8‏-Mart bayrimi" munasiwetni bilen türmidiki Uyghur ayal zhurnalistlirini xatirilidi

Muxbirimiz erkin
2019-03-09
Élxet
Pikir
Share
Print

Merkizi amérikaning nyuyork shehiridiki "Zhurnalistlarni qoghdash komitéti" 8‏-mart ayallar bayrimi munasiwetni bilen doklat élan qilip, dunyani Uyghur ayal zhurnalistlirini öz ichige alghan türmidiki ayal zhurnalistlarni untup qalmasliqqa chaqirghan. Mezkur organning 8‏-mart küni élan qilghan doklatida körsitilishiche, nöwette dunya boyiche axbaratchiliq xizmiti seweblik türmide yétiwatqan 251 neper zhurnalistning 33 nepiri ayal iken. Doklatta, xitay türmiside yétiwatqan 7 neper ayal zhurnalistning ismi tilgha élin'ghan. Ularning 3 nepiri Uyghur bolup, uningda gülmire imin, atikem rozi we chimen'gül awut tonushturulghan. Gülmire imin "Diyarim" torining sabiq tor bashqurghuchisi bolup, 2009‏-yili "5‏-Iyul weqesi" de tutqun qilin'ghan. U "Topilanggha qutratquluq qilish" bilen eyiblinip muddetsiz késilgen. "Uyghurbiz" torining bashqurghuchisi atikem roza 2014‏-yili 11‏-ayda ataqliq Uyghur öktichi ziyaliy ilham toxtigha chétilip tutqun qilin'ghan.

"Qeshqer edebiyati" ning tehriri, tonulghan sha'ir chimen'gül awut ötken yili ghayib bolghan. Radiyomiz ötken yili 11‏-ayda uning 2015‏-yili tehrirligen yazghuchi xalide isra'ilning "Altun kesh" namliq romani seweblik tutqun qilin'ghanliqini delilligen idi. Zhurnalistlarni qoghdash komitéti doklatida, chimen'gül awutning xitayning Uyghurlarni basturushida tutqun qilin'ghanliqi, uning xeterlik kitablarni neshr qilghan, dep eyiblen'genlikini bildürgen. Zhurnalistlarni qoghdash komitéti "8‏-Mart bayrimi" munasiwiti bilen élan qilghan bayanatida, halqiliq hadisilerni xewer qilip öch élishqa uchrighan dunyaning her qaysi jayliridiki bu ayal zhurnalistlargha hörmet bildüridighanliqini tekitligen.

Toluq bet