Turpan boyluqtiki bir toqumichiliq karxanisida 300 dek Uyghurning ishleydighanliqi ashkarilandi

• Muxbirimiz erkin
  2021-04-19

Xitaydiki “Rüyzé toqumichiliq cheklik shirkiti” ning turpan boyluq yézisidiki zawutida 300 dek Uyghurning ishleydighanliqi ashkarilandi. Bu uchur mezkur shirketning bu zawuttiki ishchilarni teshkillep, bir qisim xelq'ara dangliq markilarning “Shinjang paxtisi” ishlitishni ret qilish qararigha qarshi élan qilghan bayanatidin melum bolghan. Közetküchilerning éytishiche, rayondiki Uyghur ishlemchiler merkezleshken bu xil zawut-karxanilarning hemmisi mejburiy emgekke chétishliq bolup, bu orunlardiki Uyghur ishlemchiler “Herbiy tüzüm” bilen bashqurulidiken.

“Rüyzé toqumichiliq cheklik shirkiti” yéqinda bu karxanidiki barliq “Ishchi-xizmetchiler” ning namida bayanat élan qilip, “Shinjangda mejburiy emgikining mewjut emesliki” ni ilgiri sürgen. “Tengritagh” torining bu heqtiki xewiridin ashkarilinishiche, bu shirketning boyluqtiki zawutida 376 neper ishchi-xizmetchisi bar bolup, “Az sanliq milletler” uning %80 ni teshkil qilidiken. Bu shirket bayanatida, özlirining her xil qanun-tüzümlerge emel qilidighanliqi, ishchilar bilen toxtam tüzidighanliqi, ularni “Azade turalghu bilen teminleydighanliqi” ni ilgiri sürgen.

Biraq chet'el tetqiqat orunlirining élan qilghan bu heqtiki doklatlirida ashkarilinishiche, bu xil yataqliq toqumichiliq karxaniliridiki Uyghur ishlemchilirining öyige qaytishigha ruxset qilinmaydiken. Amérikadiki “Kommunizm qurbanliri xatire fondi” ning tetqiqatchisi adriyan zénz özining yéqinda élan qilghan bir doklatida, xitayning Uyghurlarni zawut-karxanilargha yötkishi uning Uyghur nopusini tarqaqlashturush pilanining birqsmi ikenlikini bildürgen.