Турпан бойлуқтики бир тоқумичилиқ карханисида 300 дәк уйғурниң ишләйдиғанлиқи ашкариланди

Мухбиримиз әркин
2021.04.19

Хитайдики “рүйзе тоқумичилиқ чәклик ширкити” ниң турпан бойлуқ йезисидики завутида 300 дәк уйғурниң ишләйдиғанлиқи ашкариланди. Бу учур мәзкур ширкәтниң бу завуттики ишчиларни тәшкилләп, бир қисим хәлқара даңлиқ маркиларниң “шинҗаң пахтиси” ишлитишни рәт қилиш қарариға қарши елан қилған баянатидин мәлум болған. Көзәткүчиләрниң ейтишичә, райондики уйғур ишләмчиләр мәркәзләшкән бу хил завут-карханиларниң һәммиси мәҗбурий әмгәккә четишлиқ болуп, бу орунлардики уйғур ишләмчиләр “һәрбий түзүм” билән башқурулидикән.

“рүйзе тоқумичилиқ чәклик ширкити” йеқинда бу карханидики барлиқ “ишчи-хизмәтчиләр” ниң намида баянат елан қилип, “шинҗаңда мәҗбурий әмгикиниң мәвҗут әмәслики” ни илгири сүргән. “тәңритағ” ториниң бу һәқтики хәвиридин ашкарилинишичә, бу ширкәтниң бойлуқтики завутида 376 нәпәр ишчи-хизмәтчиси бар болуп, “аз санлиқ милләтләр” униң %80 ни тәшкил қилидикән. Бу ширкәт баянатида, өзлириниң һәр хил қанун-түзүмләргә әмәл қилидиғанлиқи, ишчилар билән тохтам түзидиғанлиқи, уларни “азадә туралғу билән тәминләйдиғанлиқи” ни илгири сүргән.

Бирақ чәтәл тәтқиқат орунлириниң елан қилған бу һәқтики доклатлирида ашкарилинишичә, бу хил ятақлиқ тоқумичилиқ карханилиридики уйғур ишләмчилириниң өйигә қайтишиға рухсәт қилинмайдикән. Америкадики “коммунизм қурбанлири хатирә фонди” ниң тәтқиқатчиси адриян зенз өзиниң йеқинда елан қилған бир доклатида, хитайниң уйғурларни завут-карханиларға йөткиши униң уйғур нопусини тарқақлаштуруш пиланиниң бирқсми икәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.