Amérika dölet mejlisining xitay ishliri ijra'iye komitéti xitay hökümitidin tutqun xelchem pazilni qoyup bérishni telep qildi

Amérika dölet mejlisining xitay ishliri ijra'iye komitéti 15-yanwar küni“X”  tori, yeni burunqi twittérda chaqiriq élan qilip, xitay hökümitini  korlaliq tutqunlardin 78 yashliq xelchem pazilni qoyup bérishke chaqirghan.

2022-Yili 1-ayda muxbirimiz korladiki alaqidar organlargha qarita élip barghan éniqlishida, 78 yashliq xelchem pazilning xitay hökümiti teripidin “Jama'et tertipini qalaymiqan qilish” bilen eyiblinip, 17 yilliq késiwétilgenlikini, uning sanji ayallar türmiside jaza mudditini ötewatqanliqini delilligen. Melum bolushiche, eyni waqitta bir a'ilidin xelchem pazilni öz ichige alghan 5 ayalgha éghir jaza  bérilgen. Sotning hökümnamiside, “Milliy kemsitishke qutratquluq qilish”, “Topliship jama'et tertipini buzush” dégenler bilen eyiblen'gen xelchem pazilning, atalmish bu“Jinayetliri” ge uning “Qanunsiz bir teblighge qatnishishi”, “Teblighge qanunsiz sorun hazirlap bérishi” pakit qilip körsitilgenidi.

 Amérika dölet mejlisi xitay ishliri ijra'iye komitéti X ta élan qilghan chaqiriqida: “Xelchem pazil a'ile ezaliri bilen yighilip, a'ile turmushi we islam heqqide söhbet élip barghanliqi üchün qamaqqa höküm qilin'ghan 17 yilni tügitip chiqsa, 92 yashqa kiridu. Xitay xelq jumhuriyitige diniy étiqadi we milliti sewebidin tutqun qilin'ghan barliq Uyghurlarni qoyup bérishi üchün bésim qilinishi kérek” déyilgen. Amérika dölet mejlisi xitay ishliri ijra'iye komitétining bu chaqiriqi b d t kishilik hoquq kéngishi 23-yanwardin bashlap xitay kishilik hoquq xatirisini qerellik körüp chiqidighan bir peytte élan qilin'ghan. Sanji ayallar türmisidiki xadimlarning muxbirimizgha ashkarilishiche, nöwette xelchem pazil sanji ayallar türmisining 4-etritide jaza mudditini ötimektiken.

 Weqedin xewerdar zatlarning muxbirimizgha bergen uchuridin yette perzentning anisi bolghan xelchem pazilning 2015- yaki 2016-yilliri türkiyege kelgenliki we mekkige bérip hej qilip qaytqanliqi melum. Lékin uning 17 yilliq késilishide, chet'el sepirining tesiri bar-yoqluqi hazirche melum emes.