Amérika Uyghur birleshmisi 21-may saylam ötküzüp, özining yéngi rehberlik hey'itini saylap chiqidu

Amérikadiki Uyghurlar 21-may küni saylam ötküzüp, özlirining amérikadiki eng chong wekillik teshkilati bolghan amérika Uyghur birleshmisining yéngi bir nöwetlik rehberlik hey'itini saylap chiqidu.

Bu qétimqi saylam xitayning amérika hökümiti teripidin “Irqiy qirghinchiliq” dep békitilgen Uyghurlarni keng kölemlik tutqun qilip lagér, türmilerge qamash, tughmas qilish, mejburiy emgek sélishtek wehshiylikliri 6-yiligha qedem qoyghan bolsimu, biraq uning siyasitide héchqandaq bir ‍özgirish bolmighan, xitayning wehshiylikining kölimi we éghirliq derijisige a'it yéngi höjjetler dawamliq ashkariliniwatqan bolsimu, biraq xelq'ara jem'iyet bu wehshiylikni toxtitishta yéterlik heriket qollanmighan nazuk bir weziyette ötküzülidu.

Melum bolushiche, 21-may chüshtin kéyin wirijiniye shtatidiki bir méhmanxanida ötküzülidighan saylamgha qarita jiddiy bixeterlik tedbirliri élin'ghan. Saylam meydanining ichi we sirtini yerlik saqchilarning qoghdaydighanliqi melum. Weqedin xewerdar zatlarning éytishiche, bu bixeterlik tedbirliri xitayning uzun qolining amérikadiki Uyghurlargha qarita yolgha qoyup kelgen tehdit sélish, qorqutush, hetta buzghunchiliq heriketliri bilen munasiwetlik iken.

Amérika dölet mejlisi ezaliri ilgiri amérika bixeterlik tarmaqlirigha amérikadiki Uyghurlarni xitayning bésimidin qoghdash toghrisida chaqiriqlarda bolghan. Amérika fédiratsiye tekshürüsh idarisi Uyghurlarni qoghdashqa munasiwetlik mexsus alaqe liniyesi tesis qilghan. Amérika edliye ministirliqi yéqinda bu xil heriketler bilen shughullan'ghan 5 neper xitay jasusini qolgha élip eyibligenidi.

Melum bolushiche, amérika Uyghur birleshmisining re'islikige hazirgha qeder peqet birla kishi özini namzatliqqa körsetken. Amérika Uyghur birleshmisining bash katipi elfidar iltebir xanimning özini namzatliqqa körsetkenliki we özidin bashqa töt kishilik bir hey'et guruppisi teshkilligenliki melum. Melum bolushiche, hey'et guruppisidikiler pütünley yashlardin teshkil tapqan.