Uyghur rehbiri kadirliri atalmish “Üch xil küch”ke qarshi qesemyad qilishni dawamlashturmaq

Muxbirimiz ümidwar
2017.05.29

Uyghur diyaridiki her derijilik hökümet organliri, wilayet we nahiyelerdiki organlarning “Üch xil küchler”ge qarshi küresh qilish qesemyad yighinliri izchil dawamlashmaqta. 27-May küni Uyghur aptonom rayonluq hökümetke biwasite qarashliq organlar we ishchilar uyushmisining qesemyad murasimi ötküzülüp, bir qisim Uyghur rehbiri kadirlarning bashchiliqida qesemyad qilin'ghan we wedinamige imza qoyulghan.

Xitay metbu'atlirining uchurliridin ashkarilinishiche, mezkur yighin'gha Uyghur aptonom rayonluq hökümetke biwasite qarashliq organlarning partiye sékritarliri we mu'awin sékritarlar, bashliqliri hemde kompartiye ezaliri bolup, 420 adem qatnashqan.

Bir qisim Uyghur rehbiri kadirlar, yeni Uyghur aptonom rayonluq islahat we tereqqiyat komitétining partiye sékritari dolqun toxti, Uyghur aptonom rayonluq bash ishchilar uyushmisining mu'awin re'isi enwer abduraxman, Uyghur aptonom rayonluq jama'et xewpsizlik nazariti siyasiy bölüm mu'awin bashliqi alim atawulla qatarliqlar atalmish “Üch xil küchler” ge qarshi küresh qilip, “Kommunistik partiyige sadiq bolidighanliqliri”heqqide wede bérishken.

Yighinda 100 din artuq kompartiye guruppilirigha mes'ul kadir özlirining mes'ulliqidiki barliq partiye ezalirigha wakaliten wedinamige imza qoyghan.

Mundaq xildiki yighinlarning yene biri 26-may küni ürümchi sheherlik hökümet teripidin uyushturulghan bolup, asasliqi ürümchige shehirige biwasite qarashliq idare-organlarning kadirliri, partiye ezalirini asas qilghan mezkur yighinda bir qisim Uyghur kadirlar “Üch xil küchler” ge qarshi küresh qilish wedilirini bergen we kolléktip qesem qilghan.

Chet'ellerdiki Uyghur közetküchiler, yéqinqi waqitlardin buyan xitay da'iriliri teripidin Uyghur diyarida élip bériliwatqan atalmish “Üch xil küchler”ge qarshi jeng élan qilish nami astida Uyghur kadirliri we ammisining ipade bildürüsh, qesem bérish we wedinamige imza qoyush, shuningdek bir qisim Uyghur kadirlarning ochuq xet we bayanatlar élan qilish heriketlirini xitayning ötken esirning 60-70-yilliridiki “Medeniyet inqilabi”dinmu ashuriwétilgen esebiy heriket dep tenqid qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.