Uyghur aptonom rayonluq j x da'iriliri tor uchur erkinlikige zerbe bérishni kücheytken

Uyghur aptonom rayoni j x da'iriliri 2024-yilining kirishi bilen teng rayonda tor uchur erkinlikige zerbe bérishni kücheytken. Xitay taratqulirining ashkarilishiche, Uyghur aptonom rayonluq j x da'irilirining rayonda tor erkinlikige zerbe bérishni kücheytish herikiti, xitay jama'et xewpsizlik ministirliqining 2024-yilliq “Torda ösek söz tarqitishqa zerbe bérish mexsus herikiti” ning bir parchisi iken. “Shinjang géziti” ning xewiridin qarighanda, Uyghur aptonom rayonluq j x nazariti 5-yanwar küni uchur erkinlikige zerbe bérish herikitining bir parchisi süpitide torda “Ösek söz” tarqitish bilen eyiblinip bir terep qilin'ghan 5 tipik déloni élan qilghan.

Xewerde, yuqiriqi besh tipik délogha chétishliq shexslerning ürümchi saybagh rayoni, shixenze, qumulning iwérghol, aqsuning uchturpan we xitayning shendung ölkisidiki wéyfang shehiride olturushluq puqralar ikenliki qeyt qilinmaqta. “Shinjang géziti” ning éytishiche, Uyghur aptonom rayonluq j x da'iriliri shendung j x organliri bilen birliship, torda Uyghur rayonida yer tewrigenlikige da'ir uchur tarqatqan wang famililik bir kishige memuriy tutup turush jazasi bergen.

 Xewerde, qalghan 4 kishigimu gensuda yer tewrigenliki, Uyghur rayonida térrorluq partlitish weqesi yüz bergenliki, saqchi aptomobili hujumgha uchrighanliqi, hökümetning haraq ichishni chekligenlikige a'it “Saxta xewerler” ni tarqitishi seweblik mexsus délo turghuzup tekshürüsh arqiliq, memuri tutup turush jazasi bérilgenliki bildürülgen. Lékin xitay j x da'irilirining 2024-yilliq “Torda ösek söz tarqitishqa zerbe bérish mexsus herikiti” bashlan'ghandin béri, Uyghur rayonida qanche kishining bu xil eyiblesh bilen bir terep qilin'ghanliqi melum emes. Xitay hökümiti Uyghurlarni keng kölemlik tutqun qilip, lagér, türmilerge qamash herikiti bashlan'ghan 2017-yilidin béri, Uyghur rayonida uchurni qamal qilishni téximu kücheytkenidi. Xitay j x ministirliq ministirliqi ötken yili 12-ayda, 2024-yilini “Torda ösek söz tarqitishqa zerbe bérish yili” dep élan qilghanidi.