UHRP Ning yéngi doklati Uyghur diyaridiki “Sayahetchilik” ning mahiyitini pash qildi

Xitay hökümitining Uyghur diyaridiki qirghinchiliqni yoshurush urunushlirining biri “Sayahetchilik” pa'aliyiti bolup, bu arqiliq bu jaydiki “Bextiyar we inaq” jem'iyet kartinisini dunyagha sunup kelgenidi. Uyghur kishilik hoquq qurulushi (UHRP) 17-yanwar küni élan qilghan bu heqtiki mexsus doklat xitay hökümitining bu qilmishigha yoshurun'ghan barliq meqsetlirini toluq pash qildi.

Doklatta yawropadiki 18 döletning sayahet shirketliri teshkilligen ömeklerning pa'aliyiti qamchilinip: “Bu ‍ömekler irqiy qirghinchiliq we insaniyetke qarshi jinayetler sadir boluwatqan sherqiy türkistan'gha sayahet qildurushni bahane qilip, özlirining yanchuqini tomlimaqta, shuningdek qirghinchiliqtin menpe'et almaqta. Biz bu qilmishni tézdin toxtitishni telep qilimiz” déyilidu.

Doklatta körsitilishiche, awstraliye, amérika we en'gliyediki besh sayahet shirkitimu 2023-yili Uyghur diyarigha sayahet ömeklirini élip barghan hemde buningdin mu'eyyen sanda iqtisadiy menpe'etke érishken. Doklatta mushu ehwallar alahide eskertilip “Biz sherqiy türkistan'gha sayahetke bérishni men'i qilish lazim, dewatqinimiz yoq. Belki sayahet ömeklirini bu rayon'gha qaritilghan sayahetni teshkillimeslikke dewet qiliwatimiz” déyilidu.

Melum bolushiche, Uyghur diyarigha barghan herqandaq sayahetchining herqandaq pa'aliyiti izchil xitay hökümitining kontrolluqida bolup, ularning yerlik xelq bolghan Uyghurlar bilen sözlishishi yaki ulardin ehwal igilishi mumkin emes iken. Shunga ular peqet aldin orunlashturulghan saxta menzirilerni körüp qaytip kelmektiken.