Uyghur kishilik hoquq qurulushi "Tyen'enmén qirghinchiliqi" xatiriside xitay hökümitini eyiblidi

2019-06-04
Élxet
Pikir
Share
Print

Washin'gton shehridiki Uyghur kishilik hoquq qurulushi teshkilati 3-iyun küni 1989-yilidiki "Tyen'enmén qirghinchiliqi" ning 30 yilliq xatirisi munasiwiti bilen mexsus bayanat élan "Bir hökümet üchün qirghinchiliq hemde insaniyetke qarshi jinayetni ottuz yilghichimu sir saqlash zadila normal bolmighan bir hadise" dep körsetti.


Bayanatta buningdin ottuz yil ilgiriki oqughuchilarning tinch namayishini qoralliq basturiwetken xitay hökümitining bu jinayetni sir saqlash arqiliq kishilerning xatirisidin öchüriwétishni qestlewatqanliqi alahide tekitlinish bilen birge, herqaysi dölet hökümetlirini xitay hökümiti sadir qiliwatqan bu hadisige qarita bir tedbir élishqa dewet qilidu.


Uyghur kishilik hoquq qurulushi teshkilatining re'isi ömer qanat bu heqte söz qilip "Xitay hökümiti ötken ottuz yil mabeynide özlirining 1989-yilidiki <4-iyun qirghinchiliqi> ni kishilerning xatirisidin yuyup tashlashning koyida bolup keldi. Emdilikte bolsa ular bir yérim milyon Uyghurning jaza lagérlirigha qamilishidek qebih ré'alliqni kishilerning yadidin chiqiriwetmekchi boluwatidu. Tyen'enmén weqesidin sawaq élish toghra kelse biz xitay hökümitining bu xildiki insaniyetke qarshi jinayetlirini yoshurushigha dawamliq yol qoymasliqimiz lazim" dep körsetti.
Bayanatta xitay hökümitining amérika, kanada, qazaqistan, jenubiy afriqa qatarliq döletlerdiki diplomatliri we elchilirining qedimi yetkenliki jayda Uyghurlar diyaridiki shunche pakitliq we  ashkara  bolghan jaza lagérlirini inkar qilip, bu heqtiki uchurlarni "Saxta uchur" dep chüshenche bériwatqanliqi ularning bu ehwallarni untulduruwétish koyida boluwatqanliqining delili süpitide otturigha qoyulidu. Shundaqla "Tyen'enmén qurbanliri xelq'araning diqqitide saqlinip kelgendek sherqiy türkistandiki jaza lagérlirida qiyniliwatqan milyonlighan Uyghurmu xelq'araning diqqitidin mustesna qalmasliqi lazim" dep körsitilidu.


Uyghur kishilik hoquq qurulushining bu heqtiki alaqidar doklatliri izchil herqaysiy sahelerning eng nopuzluq paydilinish matériyali bolup kéliwatqanliqi melum. 3-Iyun küni "Chégrasiz muxbirlar teshkilati" Uyghur kishilik hoquq qurulushining doklatliri we bayanatliri asasida xitay hökümitining hazirgha qeder az dégendimu 58 Uyghur muxbir we tehrirni tutqun qilghanliqini qattiq eyiblep bayanat élan qildi.

Toluq bet