Хитай даирилири иҗтимаий таратқулардики уйғур елиға даир үн-син учурлириға адәттин ташқири сәзгүрлүк көрсәтмәктикән

Мухбиримиз қутлан
2016-12-03
Share


Ноябирниң ахириқи һәптисидин буян үндидарда тарқиливатқан уйғур елиға даир үн-син учурлири хитай тор сақчилири билән тәшвиқат органлирини адәттин ташқири сәзгүрләштүривәткән.

Хитайдики "азадлиқ гезити тори" вә "җуңго шинҗаң тори" қатарлиқ һөкүмәт таратқулириниң хәвиригә қариғанда, 22-ноябирдин буян үндидар, фейсбук қатарлиқ иҗтимаий таратқуларда бир һәптигичә тарқалған бир қисқа син көрүниши хитай тор сақчилирини җиддийләштүривәткән.

Мәзкур син көрүнишидә хитайдики мәлум бир шәһәрниң мәркизий мәйданида қолиға узун пичақ көтүргән бириниң қалаймиқан адәм чаниған вә сақчиларниң уни етип өлтүргән җәряни көрситилгән.

22-Ноябир күни үндидарда мәзкур син көрүнишигә қошумчә қилинип: "бу төнүгүн чүштин бурун қәшқәрдики хәлқ мәйданида йүз бәргән бир зораванлиқ вәқәси. Бир нәпәр һуҗумчи узун пичақ билән 4 адәмни чанап өлтүргән. Сақчилар чақмақ тезликидә һәрикәт қилип, һуҗумчилардин 5-6 кишини нәқ мәйданда етип өлтүрди," дәп чүшәндүрүш бәргән.

Уйғур аптоном районидики қанунсиз вә тәсири яман хәвәрләрни паш қилиш мәркизи 24-ноябир күни бу һәқтә мәхсус баянат елан қилип, үндидарда тарқалған бу син көрүнишиниң сахта хәвәр икәнликини, буниң қәшқәрдә йүз бәргән раст вәқә болмастин, бәлки лявниң өлкисиниң дәндоң шәһиридә елип берилған бир маниверниң син көрүниши икәнликини илгири сүргән. Хитайда чиқидиған "азатлиқ гезити тори" вә башқа һөкүмәт таратқулириму бу һәқтә хәвәр бәргән.

Көзәткүчиләр, бу вәқә хитай даирилириниң иҗтимаий таратқулардики уйғур елиға алақидар һәрқандақ учур вә хәвәргә әң зор сәзгүрлүк билән қарайдиғанлиқини, болупму бундақ вәқәләрниң хәлқара таратқуларда ғулғула пәйда қилишидин әндишә қилидиғанлиқини көрситиду, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт