Б д т корийә һөкүмитидин өз ширкәтлириниң уйғурларниң кишилик һоқуқини дәпсәндә қилиш җинайитидин чәк-чегра аҗритишини тәләп қилған

Бирләшкән дөләтләр тәшкилати корийә һөкүмитигә тәләпнамә сунуп, самсуң, LG қатарлиқ ширкәтләрниң уйғурларниң кишилик һоқуқини дәпсәндә қилиш билән четишлиқ карханилардин мал алмаслиқини тәләп қилған.

Бирләшкән дөләтләр тәшкилати кишилик һоқуқ алий мутәхәсислири ишханисиниң пәйшәнбә күни (13-май) билдүрүшичә, кишилик һоқуқ ишлириға мәсул алаһидә хадимлар 12-март күни корийә һөкүмитигә мәктуб йезип, бу ишни сүрүштүргәникән. Мәктубта ейтилишичә, самсуң, LG қатарлиқ бир нәччә ширкәт хитайдики мәҗбурий әмгәк, халиғанчә адәм тутуш вә қул әмгәкчи әткәсчилики билән четишлиқ икән. Б д т кишилик һоқуқ оргини мәсулиниң ейтишичә, корийәдә юқири ширкәтләрдин башқа йәнә бир мунчә ширкәтләр қул әмгәк мәсилисигә четишлиқ икән.

Хәвәрдә билдүрүлүшичә, хитайдин мал алидиған хәлқара ширкәтләр адәттә толуқ һоқуқлуқ мупәттишләрниң бу мәсилини тәкшүрүшигә йол қоймайдикән. Корийә ташқи ишлар министирликиниң бир әмәлдари корийәдики бирәр ширкәтниң шинҗаңдики кишилик һоқуқ дәпсәндичиликигә четишлиқ хитай ширкити билән сода қилғанлиқини байқимиғанлиқини, шундақтиму бу мәсилини тәкшүридиғанлиқини ейтқан.