B d t koriye hökümitidin öz shirketlirining Uyghurlarning kishilik hoquqini depsende qilish jinayitidin chek-chégra ajritishini telep qilghan

Birleshken döletler teshkilati koriye hökümitige telepname sunup, samsung, LG qatarliq shirketlerning Uyghurlarning kishilik hoquqini depsende qilish bilen chétishliq karxanilardin mal almasliqini telep qilghan.

Birleshken döletler teshkilati kishilik hoquq aliy mutexesisliri ishxanisining peyshenbe küni (13-may) bildürüshiche, kishilik hoquq ishlirigha mes'ul alahide xadimlar 12-mart küni koriye hökümitige mektub yézip, bu ishni sürüshtürgeniken. Mektubta éytilishiche, samsung, LG qatarliq bir nechche shirket xitaydiki mejburiy emgek, xalighanche adem tutush we qul emgekchi etkeschiliki bilen chétishliq iken. B d t kishilik hoquq orgini mes'ulining éytishiche, koriyede yuqiri shirketlerdin bashqa yene bir munche shirketler qul emgek mesilisige chétishliq iken.

Xewerde bildürülüshiche, xitaydin mal alidighan xelq'ara shirketler adette toluq hoquqluq mupettishlerning bu mesilini tekshürüshige yol qoymaydiken. Koriye tashqi ishlar ministirlikining bir emeldari koriyediki birer shirketning shinjangdiki kishilik hoquq depsendichilikige chétishliq xitay shirkiti bilen soda qilghanliqini bayqimighanliqini, shundaqtimu bu mesilini tekshüridighanliqini éytqan.