“юникло” ниң “шинҗаң пахтиси” ни ишләтмәйдиғанлиқини билдүрүши хитайниң қаттиқ қаршилиқиға дуч кәлди

Японийәниң кийим-кечәк ширкити “юникло” (Uniqlo) ниң баш иҗраийә директори тадаши янайи 27-ноябир күни BBC ниң зияритини қобул қилғанда, юниклониң “хитайниң ғәрбий өлкисидин кәлгән пахтиларни ишләтмәйдиғанлиқи” ни билдүргән. Буниңға нарази болған хитай тәрәп юниклоға қарши күчлүк пикир еқими пәйда қилған.

BBC Ниң бу һәқтә бәргән хәвиригә қариғанда, юникло ширкити баш директориниң “шинҗаң пахтиси” ни ишләтмәйдиғанлиқи һәққидики сөзи елан қилинғандин кейин, хитай обзорчилири юниклоға қарши мақалиләрни елан қилип, бу ширкәтниң маллирини байқут қилиш шамили қозғиған. Милйонлиған хитайлар иҗтимаий алақә супилирида “шинҗаң пахтиси дуня бойичә әң яхши пахта”, “мән шинҗаң пахтисини қоллаймән”, “юниклониң хитайдики содиси чүшүп кәтти” дегән хәштәг (#) намлири астида пикир баян қилишқан.

Хәвәрдә ейтилишичә, хитай изчил түрдә юниклониң әң чоң базарлиридин бири болупла қалмай, бәлки әң муһим кийим-кечәк ишләш мәркизи һесаблинидикән. “шинҗаң пахтиси” сәвәбидин юниклоға охшаш қаршилиққа дуч кәлгән ширкәтләрдин йәнә шиветсийәниң H&M ширкити, шундақла найки, адидас, бурберри (Burberry) қатарлиқлар бар икән. 2024-Йил 9-айда, хитай сода министирлиқи йәнә кәлвин кләйн (Calvin Klein), томми һилфигер (Tommy Hilfiger) ширкәтлириниң беши болған PVH ширкитини “һечқандақ пакитсиз шинҗаң пахтисини чәклигәнлики” үчүн тәкшүридиғанлиқини билдүргәниди.

Хитай һөкүмити америка вә башқа дөләтләрниң хитайдики мәҗбурий әмгәк маллирини, җүмлидин “шинҗаң пахтиси” дин ишләнгән тоқулма буюмлирини чәклишигә қарши туруп келиватқанлиқи мәлум. 2021-Йил 3-айда, хитай ташқи ишлири министирлиқи баянатчиси хуа чүнйиң хитайдики мәҗбурий әмгәк мәсилисини инкар қилип: “бәзи чәтәл ширкәтлири хитайниң ешини йәп, хитайниң қазинини чеқиватиду” дегәниди. Бу қетим хитай ташқи ишлар министирлиқи баянатчиси мав ниң юниклониң “шинҗаң пахтиси” ни ишләтмәйдиғанлиқиға инкас қайтуруп, “шинҗаң пахтиси” ниң әң яхши пахта икәнликини, “содиға сиясәтни арилаштурмаслиқ керәклики” ни билдүргән.