Xitay hökümiti ürümchi bilen korla arisida dunyadiki eng uzun tashyol tonélni yasashqa bashlighan

Xitay hökümiti zor miqdarda meblegh sélip, tengri téghini késip ötidighan dunyadiki eng uzun musapilik téz sür'etlik tashyol tonélini yasimaqtiken. Xitay taratqulirining xewerliride, “Tengritéghi ghalibiyet tonéli” nam bérilgen bu téz sür'etlik tash yol tonélining ürümchi bilen korla arisidiki musapini zor derijide qisqartip, Uyghur rayonining shimaliy bilen jenubining qatnash alaqiside halqiliq rol oynaydighanliqi qeyt qilinmaqta. Xewerde bildürüshiche, mutexessisler yene bu tonél Uyghur rayoni bilen ottura asiya arisida yéngi qatnash yoli berpa qilip, Uyghur rayonini xelq'ara sodida téximu muhim orun'gha ige qilidiken.

Xitayning mezkur tonél qurulushi amérika we bezi gherb ellirining Uyghur mejburiy emgek mehsulatlirining éksportigha gha qarita cheklime we bayqutni kücheytiwatqan bir waqitta élip bériliwatqanliqi, diqqet qozghimaqta. Xitay da'iriliri bu tashyol qurulushining Uyghur rayonini xelq'ara quruqluq sodisida téximu muhim orun'gha ige qilidighanliqini ilgiri sürmekte. Xongkongda chiqidighan “Jenubiy xitay etigenlik pochtisi” gézitining xewer qilishiche, omumi uzunluqi 22 kilométirdin artuqraq bolghan mezkur tonélda 2025-yili pütüp qatnash bashlinidiken. Buning bilen ürümchi-korla arisidiki hazirqi yette sa'etlik qatnash musapisi 3 sa'etke qisqiraydiken.

Xitay hökümiti 2017-yili bashlan'ghan chong tutqunda Uyghurlarni keng kölemde tutqun qilip, lagérlargha qamash bilen bir waqitta, rayonning ul eslihelerge keng kölemlik meblegh sélip, uni xitayning “Bir belbagh bir yol” liniyesining muhim soda qatnash tügünige aylandurushni tézletken. Shundaqla rayonning tashqi soda éksportini shiddet bilen kéngeytken. Xitay dölet ishliri kabénti téxi yéqindila Uyghur rayonining ürümchi, qeshqer, ghulja qatarliq sheherlirini “Erkin soda rayoni” dep élan qilghan idi.