Шаңхәй шәһиридики “үрүмчи йоли” ниң вивискиси “йеңи” чә шәкилдә қайта орнитилған

Мухбиримиз әзиз
2022.11.29

Үрүмчи шәһиридики “24-ноябир от апити” паҗиәсини пилта қилған бир қатар намайишлар қатарида шаңхәй шәһиридики намайишта ши җинпиңға вә хитай компартийәсигә қарши шоарларниң товлиниши билән бу һал дуня миқясида зор ғулғула қозғиди. Болупму шаңхәй шәһиридики намайишниң “үрүмчи оттура йоли” намлиқ кочида болуши билән “үрүмчи” нами назук аталғуға айлинип 27-ноябир күни хитай һөкүмити тездин бу коча тахтисини юлуп еливәткән иди.

29-Ноябир күни шаңхәйдики хитай даирилириниң мәзкур коча тахтисиниң орниға йеңидин йезилған “вуҗоңлу” (乌中路) дегән тахтини асқанлиқи мәлум болди. Буниңда “үрүмчи” сөзиниң хитайчә аһаң тәрҗимиси орниға униңдики биринчи сөз адәттики қисқартилма сөз шәклидә қоллинилған. Шуңа бу хил тәрҗимә шәклидин хәвири йоқ кишиниң йеңидин есилған коча тахтисиға қарап униң “үрүмчи оттура йоли” дегән мәнидә икәнликини пәмлиши қийинға чүшидикән.

Хитай һөкүмитиниң бу хилдики “мәсилә һәл қилиш чариси” торларда тездин мәсхиригә учриған. “йешил ай” тәхәллусидики бирәйлән тивиттер бетидә учур йоллап “бизниң ‛қулақни етивелип қоңғурақ оғрилаш‚ дегән тәмсилимиз бәк тоғра” дәп язған.

Мәлум болушичә, шаңхәйдә “үрүмчи шималий йоли”, “үрүмчи җәнубий йоли” вә “үрүмчи оттура йоли” намлиқ үч коча бар болуп, қалған икки кочиниң нами өзгәртилгән яки өзгәртилмигәнлики һазирчә намәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.