Shangxey shehiridiki “Ürümchi yoli” ning wiwiskisi “Yéngi” che shekilde qayta ornitilghan

Ürümchi shehiridiki “24-Noyabir ot apiti” paji'esini pilta qilghan bir qatar namayishlar qatarida shangxey shehiridiki namayishta shi jinpinggha we xitay kompartiyesige qarshi sho'arlarning towlinishi bilen bu hal dunya miqyasida zor ghulghula qozghidi. Bolupmu shangxey shehiridiki namayishning “Ürümchi ottura yoli” namliq kochida bolushi bilen “Ürümchi” nami nazuk atalghugha aylinip 27-noyabir küni xitay hökümiti tézdin bu kocha taxtisini yulup éliwetken idi.

29-Noyabir küni shangxeydiki xitay da'irilirining mezkur kocha taxtisining ornigha yéngidin yézilghan “Wujonglu” (乌中路) dégen taxtini asqanliqi melum boldi. Buningda “Ürümchi” sözining xitayche ahang terjimisi ornigha uningdiki birinchi söz adettiki qisqartilma söz sheklide qollinilghan. Shunga bu xil terjime sheklidin xewiri yoq kishining yéngidin ésilghan kocha taxtisigha qarap uning “Ürümchi ottura yoli” dégen menide ikenlikini pemlishi qiyin'gha chüshidiken.

Xitay hökümitining bu xildiki “Mesile hel qilish charisi” torlarda tézdin mesxirige uchrighan. “Yéshil ay” texellusidiki bireylen tiwittér bétide uchur yollap “Bizning ‛qulaqni étiwélip qongghuraq oghrilash‚ dégen temsilimiz bek toghra” dep yazghan.

Melum bolushiche, shangxeyde “Ürümchi shimaliy yoli”, “Ürümchi jenubiy yoli” we “Ürümchi ottura yoli” namliq üch kocha bar bolup, qalghan ikki kochining nami özgertilgen yaki özgertilmigenliki hazirche namelum.