Xelq'ara kechürüm teshkilati rusiyening süriyediki hawa hujumliri “Urush jinayiti hasil qilishi mumkin” dédi

Xelq'ara kechürüm teshkilati rusiyening süriyeni bombilash herikiti “Urush jinayiti” hasil qilishi mumkin, dédi. Mezkur teshkilat charshenbe küni élan qilghan doklatida, rusiyening süriyediki hawa hujumliri netijiside yüzligen awam puqraning ölgenlikini, olturaq rayonlar, öyler, meschitler we adem köp bazarlar we hetta doxturxanilarning éghir derijide zeximlen'genlikini bildürüp “Hujumlardiki pakitlar rusiyening xelq'araliq insanperwerlik qanunlirini depsende qilghanliqini körsitidu” dégen.

Biraq, roytérs agéntliqining xewer qilishiche, rusiye mudapi'e ministirliqi xelq'ara kechürüm teshkilatining yuqiridiki sözlirini qet'iy ret qilip, teshkilatning doklatini “Yalghan bilen tolghan” dep eyibligen.

Rusiye armiyesi bu yil 30-séntebir künidin étibaren süriyediki hawa hujum herikitini bashlighan idi. Rusiye özining beshar esedke yardem qilip, “Da'ish” térror teshkilatigha hujum qiliwatqanliqini ilgiri sürüp kelgen.

Biraq, xelq'ara kechürüm teshkilati “29‏-Noyabirghiche bolghan ariliqta eng az dégende 200 neper awam puqra rusiyening hawa hujumi netijiside öldi” dédi.

Mezkur teshkilatning ottura sherq we shimaliy aghriqigha mes'ul diréktori filip lutér “Bundaq hujum urush jinayiti teshkil qilishi mumkin” dep eskertken.