Amérika we en'gliyening 3 awiyamatkisi xitaygha yéqin okinawa déngiz rayonigha yétip barghan

Amérika we en'giliyening üch awiyamatkisi okinawa déngiz rayonigha yétip kelgen. “Forbés” gézitining xewer qilishiche, bu üch awiyamatka guruppisi uzun yillardin buyan xitay déngiz tewelekige yéqin jayda körülgen eng küchlük herbiy birlik bolup hésablinidiken.

“Xanish élzabit”, “Amérika” we “Karil winson” namliq bu 3 awiyamatkining okinawa déngiz rayonigha yétip kélishi waqit jehettin diqqetke sazawer bolup, bu del yéqinqi bir nechche hepte ichide xitay déngiz armiyesining teywen'ge hujum qilishni meqset qilghan herbiy manwérlirini kücheytken mezgilge toghra kelgen. Bu awiyamatkilar guruppisining okinawa déngiz rayonida piyda bolushi, xitaygha birilgen agahlandurush bolup hésablinidiken.

Ayrim-ayrim yönilishtin chiqip axiri bir yerge jem bolghan bu awiyamatkilar we ulargha qachilan'ghan zor sandiki küreshchi ayropilanlar bashqa köpligen döletlerning barliq herbiy paraxotlardinmu zor ot küchige we zerbe bérish iqtidarigha ige iken. “Forbés” ning éytishiche, hazir xitay déngiz armiyesi peqet ikki dane awiyamatkigha ige bolup, her ikkisining hejimi we iqtidari ayal padishah élizabét namliq awiyamatkigha oxshaydiken.

Yuqiriqi bu üch awiyamatkida 80 din artuq F-35 we F-18 tipliq küreshchi ayropilan bar bolup, ularning yérimi radar qatarliq bayqash téxnikilirida körünmeydighan körünmes ayropilanlar iken. Bu awiyamatkilar yene on nechche qoghdighuchi paraxot, bir nechche su asti paraxoti we nechche yüzligen yiraq musapilik bashqurulidighan bombilarnimu öz ichige alidiken.

Amérika birleshme etritining kapitani richard lébron “Forbés” qa qilghan sözide “Yuqiriqilarning wezipisi xelq'ara ölchem, qa'ide we qanunlargha mas halda amérikaning her qandaq jayda we her waqit erkin meshghulat qilishigha kapaletlik qilishtur,” dep tekitligen.

“Forbés” ning éytishiche, teywenning musteqilliqi tehdit astida bolup, bu yil yazda xitay déngiz armiyesi teywen boghuzidin ötüshini meqset qilghan teyyarliq xizmetlirini kücheytken. Kishini eng endishige salidighini shuki, xitay déngiz armiyesi minglighan tajawuzchi eskerlerni toshushqa ishlitidighan bir qisim zor tiptiki toshush paraxotlirini seperwer qilghan iken.