Amérika awam palatasining "Uyghur kishilik hoquq qanun layihesi" ni maqullishi xelq'ara taratqularda keng inkas qozghidi

Muxbirimiz erkin
2019-12-04
Élxet
Pikir
Share
Print

Amérika awam palatasining 3‏-dékabir küni awaz bérip, "Uyghur kishilik hoquq qanun layihesi" ni maqullishi xelq'ara taratqularda keng inkas qozghidi. Nopuzluq xelq'ara taratqularning shu künki xewerliride, qanun layihesining awam palatada mutleq köp awaz bilen maqullan'ghanliqi, uning xitaygha küchlük bir signal bergenliki ilgiri sürüldi.

BBC Ning xewiride, uning xitayda turushluq muxbiri jon sadworsning awazi neqil keltürülüp, "Eger bu layihe qanun'gha aylansa, buning xitayning Uyghur we bashqa musulmanlarni keng kölemlik tutqun qilishigha qarshi bésim ishlitish yolidiki intayin muhim xelq'ara tirishchanliq bolup qalidighanliqi" tekitlen'gen. BBC Ning xewiride yene, awam palatasining qarari xitayning ghezipini qozghighan bolsimu, lékin buning Uyghur kishilik hoquq teshkilatlirining qarshi élishigha érishkenliki, ularning bu qanun layihesi "Xitaygha muhim signal béridu," dep qaraydighanliqi bildürülgen.

"Washin'gton pochtisi" géziti, qanun layiheside Uyghur musulmanlirini keng kölemlik tutqun qilishqa qatnashqan xitay emeldarlirini jazalash telep qilin'ghanliqi, washin'gton bilen béyjing arisidiki ixtilap kéngiyiwatqan bir waqitta, bu qanunning yene bir toqunush peyda qilidighanliqi ilgiri sürülgen. "Washin'gton pochtisi" ning tekitlishiche, bu qanunda Uyghur aptonom rayonluq partkom sékrétari chén chüen'go nishan'gha aylan'ghaniken. Xewerde, uning "Shinjangdiki tutqun we nazaret programmisining jawabkari" dep qariliwatqanliqi tekitlen'gen.

En'gliye "Muhapizetchi géziti" ning xewiride, bu qanunda "Xitayning shinjangdiki musulman milletlerni basturushigha qarita tramp hökümitining qattiq qol bolushi telep qilin'ghanliqi", prézidént tramp "Xitay bilen soda kélishimi imzalashqa kirishken bolsimu, emma tunji qétim uning bir xitay siyasiy biyuro ezasini jazalishi telep qilin'ghanliqi" tekitlen'gen. Amérika awam palatasining "Uyghur kishilik hoquq qanun layihesi" 3‏-dékabir awazgha qoyulup, 407 awazning qollishi, bir awazning qarshi chiqishi bilen maqullan'ghanidi.

Toluq bet