Uyghur aptonom rayonluq siyasiy-qanun komitétining mu'awin sékrétari ma gochyang kompartiyedin qoghlap chiqirilghan

Uyghur aptonom rayonluq partkomning 24-awghust küni ürümchide chaqirilghan 10-nöwetlik 12-omumiy yighini qarar maqullap, Uyghur aptonom rayonluq siyasiy-qanun komitétining mu'awin sékrétari ma gochyangni kompartiyedin qoghlap chiqirishni qarar qilghan.

Xitay hökümet taratqulirining xewerliride, ma gochyangning partiyedin qoghlap chiqirilghandin kéyinki aqiwiti qandaq bolidighanliqigha da'ir héchqandaq uchur bérilmigen bolsimu, emma uning partiyedin qoghlap chiqirilishi edliye tarmaqliri teripidin jawabkarliqqa tartilidighanliqini bildüridu, dep qaralmaqta. Bu yil 51 yashliq ma gochyang, 2023-yili 8-aydin bashlap Uyghur aptonom rayonluq intizam tekshürüsh komitéti teripidin intizam we qanun-tüzümge éghir xilapliq qilish seweblik tekshürülüshke bashlighan.

Yurti xénenlik bolghan ma gochyang, Uyghur aptonom rayonluq partkomning sabiq sékrétari chén chüen'go Uyghurlarni keng kölemde tutqun qilip, lagér we türmilerge qamighan mezgillerde aqsu shehirining partkom sékrétari, aqsu wilayetlik siyasiy-qanun komitétining sékrétari qatarliq wezipilerni ötigen.

Xitay hökümet taratqulirining xewerliridin melum bolushiche, ma gochyang 2023-yili 8-ayda aptonom rayonluq siyasiy-qanun komitétining mu'awin sékrétarliq wezipini ötewatqan mezgilde toxtitip tekshürülüshke bashlighan. Uyghur aptonom rayonluq intizam tekshürüsh komitétining bu yil 1-ayda élan qilghan chiriklikke qarshi turush heqqidiki maqaliside, ma gochyangning ismi tilgha élin'ghan. Maqalida, “Siyasiy mesile bilen iqtisadi mesililerning gireliship kétishi nöwettiki chiriklikning tipik alahidiliki” ikenliki tekitlen'gen idi. Xitay hökümet taratqulirining xewerliridin melum bolushiche, ma gochyang bir terep qilinishtin burun, uning bilen ilgiri aqsuda birge wezipe ötep, kéyin aptonom rayon'gha yötkep kélin'gen xitay emeldarlirining sanimu xéli bar iken.