Xitayning Uyghur ayal lagér shahitlirining shexsiyitige hujum qilishi qattiq eyibleshke uchridi

Muxbirimiz erkin
2021-03-01
Share

Xitayning bayanat élan qilip, Uyghur ayal lagér shahitlirining shexsiyitige hujum qilishi ijtima'iy taratquda qattiq eyibleshke uchridi. Kishilik hoquq közitish teshkilatining xitay ishliri diréktori sofiye richardson 1-mart tiwéttirda xitay tashqi ishlar ministirliqining hujumigha inkas bildürüp, "Bu özining bayanlirini kontrol qilishmu yaki irqchil ayallar düshmenlikining xitay dölet siyasiti ikenlikini étirap qilishmu" dep tekitligen. Sofiye richardsonning éytishiche, xitayning hujumi "Xitay hökümitining bu mesilide ishenchlik emeslikining qaltis istratégiyesi" iken.

Amérikadiki Uyghur adwokat reyhan eset tiwéttirdiki inkasida xitay tashqi ministirliqi bayanatchisining sözini tenqidlep, "Men bundaq peskeshlikni héchqachan anglap baqmighan" dep körsetken. Uning tekitlishiche, xitay tashqi ishlar ministirliqi bayanatchisining "Bashqilarning xaraktérige baha bérish salahiyiti yoq" iken. Uyghur lagér shahiti tursunay ziyawudun lagérlarda Uyghur ayallirigha sistémiliq basqunchiliq qiliniwatqanliqini ashkarilap dunyani zilzilige salghan. Xitay tashqi ishalar ministirliqi bayanatchisi wang wénbin ötken hepte tursunay ziyawudunning shexsiyitige hujum qilghanidi.

Roytérs agéntliqining xewer qilishiche, amérika jorjitown uniwérsitétining proféssori jéymis milward "Buni bi'ologiye, köpiyish we jinsiyet nuqtisidin alghanda dunya üchün bek qorqunchluq", "Xitay buni tonup yetkendek qilidu. Shunga uning bundaq hamaqetlerche jawap bergenlikini körüwatisiz" dégen. Roytérs agéntliqining bildürüshiche, xitay tashqi ishlar ministirliqi 1-mart Uyghur lagér shahitlirining konkrét uchurlirigha da'ir so'allargha jawab bérishni ret qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet