Uyghur ayalliri ochuq xet élan qilip, dunya ayallirini Uyghur ayallirigha yardem qilishqa chaqirdi

Muxbirimiz erkin
2021-03-08
Share

Uyghur, qazaq ayal lagér shahitliri we bir qisim Uyghur ayal pa'aliyetchiliri 8-mart xelqara ayallar bayrimi harpisida ochuq xet élan qilip, dunya ayallirini Uyghur ayalliri bilen bir septe turushqa chaqirghan.

Ochuq xette sherqiy türkistandiki Uyghurlarni asas qilghan yerlik türkiy millet ayalliri duch kéliwatqan éghir weziyetke diqqet qozghash üchün bu ochuq xetni yazghanliqi, "Nöwette Uyghur we bashqa turkiy milletler ayallirining xitay dölet da'iriliri teripidin sadir qiliniwatqan xalighanche tutqun qilish, qiyin-qistaq, basqunchiliq, mejburiy tughmas qilish, bala chüshürüshni oz ichige alghan eng qebih jinayetlerge duch kéliwatqanliqi" tekitlen'gen.

Ochuq xette ularning xitay erliri bilen toy qilishqa mejburliniwatqanliqi, balilarning aniliridin mejburiy ayriwétilip, yitimxanilargha orunlashturulghanliqi, kompartiye kadirlirining "Qoshmaq tughqan" bolush namida Uyghur a'ililirige orunlashturulup, ularni nazaret qiliwatqanliqi, buning yoldishi lagér yaki türmilerdiki köpinche Uyghur ayallirigha nisbeten jinsiy parakendichilikke uchrashtek haqaretlik muhit yaratqanliqini bildürgen. Mezkur ochuq xet qelbinur sidiq, sayragül sawutbay, tursun'ay ziyawdin qatarliq ayal lagér shahitlar hemde gollandiye, kanada, awstraliye, amérika qatarliq döletlerdiki Uyghur ayal aktiplarning namida élan qilin'ghan.

Ochuq xette bezi jasaretlik ayallarning sherqiy türkistandiki lagérlarda shahit bolghan sistémiliq jinsiy zorawanliqlarni baturluq bilen ashkarlighanliqi, lékin xitay hökümet da'irilirining bu ayal shahitlarning shexsiyitige hujum qilip, ulargha töhmet qilghanliqi eskertilgen. Ochuq xette "Dunyaning her qaysiy jayliridiki ayallarning Uyghur ayallirini qollap, Uyghur we bashqa türkiy millet ayalliri tégishlik bolghan heqiqiy hörmet we izzet ichide yashishini qolgha keltürüshke yardem qilish waqti keldi," déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet