UHRP Ниң йеңи доклати уйғур аяллири дуч келиватқан диний зулумларни паш қилди

Вашингтондин мухбиримиз әзиз тәйярлиди
2024.02.01

Вашингтон шәһиридики уйғур кишилик һоқуқ қурулуши (UHRP) 1-февралда елан қилған “‛қуран‚ өгәнгәнликкә 20 йиллиқ қамақ: уйғур аяллири вә диний зиянкәшлик” темисидики доклат уйғур дияридики диний зулумниң ташқи дуняға анчә мәлум болуп кәтмигән йәнә бир йүзини намаян қилип бәрди.

Профессор рәйчил харрис вә мустәқил тәтқиқатчи абдувәли аюпниң бирләшмә әмгики сүпитидә вуҗудқа кәлгән бу доклатта уйғур дияридики диний етиқад саһәсидә кәң көләмдә иҗра қилиниватқан түрлүк зулумлар, бастуруш вә тәқибләшләр системилиқ баян қилинған. Шуниң билән биргә уйғур бүвиләр вә башқа саһәдики аялларниң диний паалийәт вә диний кимлик сәвәбидин җинайи ишлар бойичә җазаға тартилиши һөҗҗәтлик испатлар асасида баян қилинған.

Профессор рәйчил харрис бу һәқтә сөз қилип: “бу доклат уйғур аяллири дуч келиватқан нөвәттики диний зиянкәшлик һәққидә тәпсилий мәлуматлар билән тәмин етиду. Нурғун уйғур аяллири кичик вақитлирида ‛қуран‚ өгәнгәнлики үчүнла еғир қамаққа һөкүм қилинған. Хитай һөкүмити болса диний саһәдики йетәкчилик ролини үстигә алидиғанлики аялларниң һәммисини лагерларға яки түрмигә қамиған” дегән.

Уйғур кишилик һоқуқ қурулушиниң директори өмәр қанат бу һәқтики баянатида “бу доклат уйғур аяллири дуч келиватқан зулум вә зиянкәшликни дуня миқясида әйибләшниң зөрүр болуватқанлиқини көрситиду. Бу хил зиянкәшлик маһийәттә җинсий хорлуқ, мәҗбурий туғмас қиливетиш вә мәҗбурий хитайларға тойлаштуруш билән бирликтә хитай һөкүмити иҗра қиливатқан қирғинчилиқтики мәркизий васитилардин болуп қалған” дәп көрсәткән.

Доклатта йәнә һәрқайси һөкүмәтләр, парламентлар, аялларниң һәқлирини қоғдаш җәмийәтлири вә башқа пуқрави җәмийәтләргә уйғур аяллири дуч келиватқан диний зиянкәшликкә қарши туруш йолидики бәзи тәвсийәләрму алаһидә орун алған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.