Kishilik hoquq közitish teshkilati: "Uyghur balilirining a'ilisi bilen jem bolushigha derhal yol qoyushi kérek"

Muxbirimiz erkin
2019-09-16
Élxet
Pikir
Share
Print

Kishilik hoquq közitish teshkilati 16‏-séntebir küni doklat élan qilip, xitay hökümitini atalmish "Yataqliq mektepler" we "Yétimxanilar" diki Uyghur balilirining derhal a'ilisi bilen jem bolushigha yol qoyulushqa chaqirdi. Doklatta qeyt qilinishiche, "Xitay hökümiti Uyghur we bashqa musulman türki millet balilirini a'ilisidin zörüriyetsiz ayriwétishtek bu qilmishigha derhal xatime bérishi kérek" iken.

Xitay hökümitining 2017‏-yili bashlan'ghan "Térrorluq", radikalliq" qa zerbe bérish herikitide 2 milyondek Uyghur we bashqa musulman türki milletler tutqun qilinip, lagérlargha qamalghan, nurghun kishi qamaq jazalirigha mehkum qilin'ghanidi. Doklatta, xitay hökümitining tutqun qilin'ghan yaki chet'ellerge chiqip ketken sansizlighan kishining perzentlirini ata-anilirining maqulluqisiz dölet igidarchiliqidiki balilar parawanliq orunlirigha we yataqliq mekteplerge yighiwalghanliqi tekitlen'gen. Doklatta mezkur teshkilatning xitay bölümining diréktori sofiye richardsonning sözi neqil keltürülüp, "Xitay hökümitining balilarni mejburiy ayriwétishi belki, shinjangdiki basturushning eng rehimsiz éliméntidur. Balilar derhal xitayda turushluq uruq-tughqanlirining béqishigha qayturup bérilishi yaki chet'ellerdiki ata-aniliri bilen jem bolushigha yol qoyulushi kérek" déyilgen.

Doklatta yene, hökümet höjjetliride balilarni dölet igilikidiki bu orunlargha ewetish toghrisida intayin az uchur barliqi eskertilip, bu höjjetlerde kimlerning maqullighini élish kérekliki, buninggha qaysi hökümet organlirining mes'ul ikenliki éniq körsitilmigenliki, özlirining ilgiri bezi yerlik da'irilerning yétim balilarni toplash toghrisida yuqiri derijilik organlardin sanliq wezipe tapshuruwalghanliqini xewer qilghanliqi bildürülgen. Doklatta qeyt qilinishiche, kishilik hoquq közitish teshkilati bu doklatni teyyarlashta perzentliri bilen alaqisi üzülüp qalghan chet'eldiki 5 a'ilini ziyaret qilghan.

Toluq bet