“Nyu-york waqti” géziti xitayning basturushi chet'ellerdiki Uyghurlarda peyda qilghan psixologiyelik bésimni xewer qildi

Muxbirimiz erkin
2021-11-08
Share

“Nyu-york waqti” géziti 8-noyabir küni xitayning 2017-yili bashlan'ghan chong tutqunining chet'ellerdiki Uyghurlarda peyda qilghan psixologiyelik bésimi xewer qilghan. Xewerde éytilishiche, chet'eldiki Uyghurlar shinjangda azab-oqubet tartiwatqan a'ililirining iztirapni yéngishke tirishish bilen bir waqitta, bezi Uyghurlarning psixologiyelik meslihet sorashta medeniyet jehettiki tosqunluqlarnimu yéngishke toghra kelmektiken.

“Iztirapning kündilik kölenggisi: chet'elde hés qilin'ghan xitaydiki basturush” mawzuluq xewerde, xitayning basturushining psixologiyelik tesirige uchrighan Uyghurlarning kündilik hayatidiki rohiy iztirap we ularning buni yéngish üchün qandaq tirishchanliqlarni körsitiwatqanliqi yorutup bérilgen.

Xewerde körsitilishiche, xitay hökümiti Uyghur élide basturushni kücheytkendin buyanqi töt yildin köprek waqittin béri, chet'eldiki Uyghurlar buning iztirapigha qarshi tedbirlerni kücheytken. Jama'et rehberliri, kespiy meslihetchiler, pida'iylar bu “Asta xaraktérlik krizis” ke qarshi heriketke ‍ötken. Amérikaning washin'gtonda shundaqla bélgiye, gérmaniye, awstraliye qatarliq döletlerde kölimi kichik bolsimu, psixologiyelik meslihet bérish guruppiliri qurulghan.

Biraq xewerde yene medeniyet amili seweblik bezi Uyghurlarning psixologiyelik meslihet sorashta ikkilinidighanliqi, awstraliyediki ijtima'‍iy mulazimet xizmetchisi nurgül sawutning buningda “Bezi kishiler héssiyat jehettin özini mest qilidu yaki héchqandaq ish bolmighandek körsitidu” dégenliki tekitlen'gen. Xewerde éytilishiche, gheyriy resmiy ray sinash netijiliri chet'eldiki nurghun Uyghurlarning melum shekildiki rohiy zexmilinish, chüshkünlük yaki teshwishlinishke duchar bolghanliqini körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet