Xitay kompartiyesining Uyghur rayonidiki yéngi rehberlik qatlimi rayondiki basturush siyasitining dawam qilidighanliqidin bisharet bergen

• Muxbirimiz irade
  2021-11-10

Xitayning “Tengritagh tori” qatarliq hökümet taratquliridin melum bolushiche, yéqinda Uyghur rayonluq partkom da'imiy komitétining yéngidin teyinlen'gen ezaliri herqaysi wilayet, oblast, sheherlergiche bérip “Uyghur aptonom rayonluq 10-qétimliq partiye qurultiyining rohini öginish, izchillashturush, jasaret bilen ijtima'iy muqimliq we ebediy eminlik yéngi weziyitini yaritish” ni telep qilghan.

Uyghur aptonom rayonluq partkomning da'imiy ezaliqigha yéngidin teyinlen'gen yüsüpjan memet, élzat exmetjan we qadin kebin qatarliqlar ayrim-ayrim halda bay nahiyesi, köktoqay nahiyesi, lopnor nahiyesi qatarliq jaylarda tekshürüsh élip bérip, bu jaylarda “Ijtima'iy muqimliqni saqlash, menggülük eminlikni ishqa ashurush, kepilik mehellilerni özgertish qurulushini dawamlashturush, ishik aldida ishqa orunlishishni yenimu kücheytish” heqqide söz qilghan.

Atalmish “10-Qétimliq partiye qurultiyining rohini öginish, izchillashturush” herikiti Uyghur élida omumiyyüzlük tekitliniwatqan bolup, yéqinda shinjang Uyghur aptonom rayonluq partiye komitéti teshwiqat bölümi we sotsiyalizm nezeriyesi tetqiqat merkizi mu bu heqte bir yighin chaqirip, “Aptonom rayonluq partiye komititining yéngi dewrdiki shinjang istratégiyesini toluq we toghra yolgha qoyush, uni ching tutush-ijtima'iy muqimliq we uzun muddetlik muqimliqning omumiy nishani” dep körsetken.

Yighinda “Muqimliq we uzun muddetlik eminlikning omumiy nishanini mehkem saqlash, ‛jungxu'a milliti ortaq éngi‚ ni singdürüsh, shinjangdiki islam dinini xitaychilashturushni yenimu kücheytish kérek,” déyilgen.

Yuqiriqi bu yighin'gha Uyghur aptonom rayonluq ijtima'iy penler birleshmisi, shinjang ijtima'iy penler akadémiyesi, shinjang uniwérsitéti, shinjang pédagogika uniwérsitéti we bashqa orunlarning munasiwetlik tetqiqatchiliri qatnashqan.

Chet ellerdiki közetküchilerning qarishiche, bu xitay hökümitining Uyghur élida nöwette dawamlishiwatqan keng kölemlik tutqun, mejburiy emgek qatarliq Uyghurlarni yoqitishni meqset qilghan siyasetlirining yenimu küchiyidighanliqining bir bishariti iken.