Washin'gton, nyu-york we bostonda sherqiy türkistan jumhuriyet küni xatirilendi

Muxbirimiz jewlan
2020-11-12
Share

1933-Yil we 1944-yil 12-noyabir küni qurulghan ikki qétimliq sherqiy türkistan jumhuriyiti xatiriliniwatqan bügünki künde amérikaning washn'gton, nyu-york we boston qatarliq sheherliride tebriklesh pa'aliyetliri ötküzüldi.

Ötken esirning 30-we 40-yillirida qurulghan ikki qétimliq sherqiy türkistan jumhuriyiti Uyghurlarning musteqilliq iradisi we musteqilliq kürishining ulugh netijisi bolup, ta bügün'giche Uyghurlargha mustemlikichilik zulumlirigha tiz pükmesliktek milliy rohni ata qilip keldi. Pa'aliyetchilerning qarishiche, bir-birining dawami bolghan bu ikki jumhuriyetning tughulghan künini xatirilesh we qedirlesh bügünki künde xitayning irqiy qirghinchiliqigha uchrawatqan Uyghur xelqining zulumgha birdek qarshi turush rohini kücheytidiken hemde xitay mustemlikisi'idin qutulup, azadliqqa érishish iradisini mustehkemleydiken.

Bu munasiwet bilen bügün dunya Uyghur qurultiyi, Uyghur herikiti teshkilati we amérika Uyghur akadémiyesi qatarliq teshkilatlar birlikte bash shitabi nyu-yorktiki birleshken döletler teshkilatining binasi aldida sherqiy türkistan jumhuriyitining musteqilliq künini xatirilidi. Pa'aliyetchilerning qarishiche, birleshken döletler teshkilatining nyu-yorktiki binasi aldida sherqiy türkistanning ay-yultuzluq kök bayriqini chiqirish murasimi küchlük simwolluq ehmiyetke ige bolup, pütün dunyagha Uyghur xelqining erkin, hör we musteqil yashash iradisini namayan qilidiken.

Amérika Uyghur birleshmisi ötken yili jumhuriyet künini xatirilep chong pa'aliyet ötküzgenidi, bu yil korona wirusi sewebidin bundaq pa'aliyet ötküzelmigen bolsimu, emma bügün washnigtondiki xitay elchixanisi aldida sherqiy türkistan bayriqini chiqirish murasimi ötküzdi.

Bostondiki Uyghurlarmu bügün boston Uyghur uyushmisining riyasetchilikide boston sheher merkizide sherqiy türkistan dölet naxshisi éytish we sherqiy türkistan bayriqi'ini chiqirish murasimi ötküzdi.

Buningdin bashqa, 12-noyabir küni dunyaning her qaysi jayliridiki Uyghur jama'iti Uyghur teshkilatlirining uyushturushi bilen axbarat élan qilish yighini échish, sherqiy türkistanning ay-yultuzluq kök bayraqini chiqirish we dölet marshi oqush, nutuq sözlesh qatarliq her xil shekiller arqiliq sherqiy türkistan jumhuriyet künini xatirilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet