Русийәдә өткүзүлгән хәлқара бокс мусабиқисидә уйғур вә қазақ маһирлар 32 күчлүк маһир қатариға киргән

Мухбиримиз әркин
2019-09-16
Елхәт
Пикир
Share
Принт

Русийәниң йекатеринбург шәһиридә өткүзүлүватқан 20‏-нөвәтлик хәлқара бокс мусабиқисидә уйғур вә қазақ маһирлар рәқиблирини йеңип, 32 күчлүк маһир қатариға киргән.

Таратқуларниң илгири сүрүшичә, уйғур, қазақ маһирлириниң 21‏-сентәбир күни ахирлишидиған мусабиқидә зор нәтиҗә қазинишиға үмид билән қаралмақтикән. Бу қетимқи мусабиқигә уйғур аптоном районидин икки уйғур, икки қазақ болуп 4 бокс маһири қатнашқан. Униңда муһәммәт турсун чоң 69 килограмлиқлар, тохтарбек талатқан 77 килограмлиқлар, абдурешит реһиммолла 91 килограмлиқлар, байқузи данабек 91 килограмлиқлардин юқири дәриҗиликләр түрлиридә мусабиқигә чүшкән. Хитай таратқулириниң билдүрүшичә, өткән һәптидики мусабиқиләрдә тохтарбек талатқан 77 килограмлиқларда шотландийәлик рәқибини, абдурешит реһиммолла билән муһәммәт турсун 91 вә 69 килограмлиқларда мисирлиқ рәқибини йәңгән.

Бу қетимқи мусабиқигә хитайдин 8 боксчи қатнашқан болуп, уйғур вә қазақлар хитай бокс командисиниң йеримини тәшкил қилған. Хитай таратқулирида бу нөвәтлик дуня бокс мусабиқисигә уйғур аптоном районидин әң көп боксчи қатнашқан мусабиқә болғанлиқи илгири сүрүлгән. Хитай һөкүмити 2 милйондәк уйғур, қазақ вә башқа мусулманларни йиғивелиш лагерлириға қамап, дуняниң қаттиқ тәнқидигә учраватқан бир мәзгилдә 4 маһирниң юқириқи утуқни қазиниши диққәт қозғимақта.

Хитайдики «суху тори» ниң хәвәр қилишичә, муһәммәт турсун чоң 16‏-сентәбир күни олимпик чемпийони, кубалиқ боксчи җулиу сезар лакруз билән мусабиқигә чүшидикән. 8‏-Сентәбир күни башланған бу нөвәтлик бокс мусабиқисигә 78 дөләт вә райондин 450 тәк боксчи қатнашмақта.

Пикирләр (0)
Share
Толуқ бәт