Uyghur boks mahiri memettursun chong xitay memliketlik boks musabiqiside yene chémpiyon bolghan

Uyghur tenheriketchiliri uzun yillardin buyan boks türi bilen putbol saheside xitay boyiche eng aldinqi orunni saqlap kéliwatqan bolup, ularning xelq'araliq musabiqilerdimu arqa-arqidin yaxshi netijilerni qazinishi Uyghur xelqige ümid we ishench ata qilmaqta.

11-Awghust kechqurun Uyghur boks mahiri memettursun chong xitayda ötküzülgen 13-nöwetlik memliketlik tenterbiye musabiqisining boks türide ichki mongghul aptonom rayonidin kelgen mongghul reqibi xurchabiligni yéngip yene bir qétim chémpiyon bolghan.

Shinxwa torining bu heqtiki xewirige qarighanda, Uyghur boks mahiri memettursun chong shu küni 69 kilogramliqlar boyiche ötküzülgen axirqi hel qilghuch musabiqide 1 ge qarshi 4 netije bilen ichki monggholluq reqibini urup yiqitqan. 

Bu memettursun chongning üch yildin buyan 69 kilogramliqlar boyiche xitayda arqa-arqidin 3 qétim chémpiyon bolushi iken.

Xewerde déyilishiche, birinchi meydan tutushushta mongghul mahiri xurchabilig biraqla hujum qozghap deslepte üstünlükni igiligen. Halbuki, birinchi meydanliq élishish axirlishishqa peqet 2 minut 35 sékunt qalghanda memettursun chong chaqmaq tézlikide hujumgha ötüp, üstünlükte turuwatqan reqibini urup yiqitqan. Shuningdin kéyinki 3 meydan musabiqide memettursun chong izchil halda hujum halitini saqlap, reqibi xurchabiligni arqa-arqidin urup yiqitqan we axirqi netijini qolgha keltürgen.

Yene bir qétim xitay boyiche chémpiyonluqini qolgha keltürgen memettursun muxbirgha mundaq dégen: “Gerche yéshim chongiyip ketken bolsimu, lékin yene dawamlashturmaqchimen. Kéyinki nishanim 2020-yili tokyoda ötküzülidighan olimpik tenterbiye musabiqiside netije qazinishtur.”

Xewerde déyilishiche, bu qétimliq boks musabiqiside yene Uyghur boks mahiri exmet memet 91 kilogramliqlar boyiche, qazaq mahiri toxtarbeg qalatxan 75 kilogramliqlar boyiche xitay dölet komandisidiki xitay reqiblirini urup yiqitip, chémpiyonluqini qolgha keltürgen.