Xitayning Uyghurlar mesiliside chéchenlerdin örnek éliwatqanliqi ilgiri sürüldi

Muxbirimiz irade
2016-12-13
Share

Xelq'ara taratqularda xitay hökümitining öz béshini aghritiwatqan Uyghurlarning qarshiliq herikitini basturushta, rusiyege sadiq chéchen hökümitidin örnek éliwatqanliqi ilgiri sürüldi.

Amérika awazi radiyosida 13-dékabir seyshenbe küni élan qilin'ghan "Xitay chéchenning tejribisi arqiliq shinjangni bashqurmaqchi" mawzuluq xewerde bayan qilinishiche, chéchiniyening rusiye prézidénti putin'gha sadiq prézidénti qadirof "Chéchéniye bixeterlik xadimliri radikal qarshiliq heriketlirini basturush we xelq'ara térrorizmgha zerbe bérish tejribiliri xulasilen'gen matériyallarni xitaydiki kesipdashlargha tapshurup berdi" dégen we xitay hökümitining Uyghurlarning barghanche küchiyiwatqan qarshiliq heriketlirini basturushta "Chéchen hökümitidin örnek éliwatqanliqi"ni ilgiri sürgen.

Xewerdin melum bolushiche, chéchen prézidénti ramizan qadirof sözide yene, chécheniye bixeterlik xadimliridin teshkillen'gen bir ömekning yéqinda ürümchide ziyarette bolghanliqini, mezkur ziyaret jeryanida chéchiniye we xitay terep bixeterlik xadimlirining jem'iyet muqimliqini saqlash mesiliside öz-ara tejribe almashturghanliqini éytqan.

Melum bolushiche, 90-yillarning béshida sabiq sowét ittipaqi parchilinip, ottura asiyadiki türkiy jumhuriyetler musteqilliqini jakarlighan mezgillerde, chécheniyediki musteqilliq terepdarlirimu chécheniyening musteqilliqini telep qilip rusiye hökümitige qarshi qoralliq heriketlerni qilghan. Emma rusiye muhim énérgiye menbesi bolghan chécheniyening musteqil bolushini barliq imkaniyetler bilen tosqan. Birqanche yilliq qoralliq toqunushlardin kéyin, chécheniyede rusiyege mayil aptonomiyilik hökümet qurulghanliqi jakarlan'ghan. Emma chécheniyediki rusiyege qarshi terepdarlar mezkur hökümetni qorchaq hökümet dep étirap qilmaydighanliqini jakarlap, heriketlirige dawam qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet