Uyghur diyarining chégra rayonliridiki ahaliler köchürülmektiken

Muxbirimiz sada
2019-07-05
Élxet
Pikir
Share
Print

Xitay hökümitining Uyghurlar zich olturaqlashqan jaylardiki Uyghurlarni atalmish "Namratliqtin qutuldurush" namida bashqa jaylargha yötkewatqanliqi ilgiri sürülüwatqan peytte taghliq chégra rayonlardiki yerlik ahalilermu atalmish "Bixeter öy" lerge köchürülmektiken.

Shinxu'a torining 5-iyuldiki munasiwetlik xewirige qarighanda, tashqorghan nahiyesining chégra boyliridiki yerlik ahaliler tüzlenglik rayonlirigha köchürülüshke bashlighan. Asasiy nopusi tajiklardin teshkil tapqan tashqorghan tajik aptonom nahiyesining chégra boyliridiki bu jaylar tajikistan, afghanistan we pakistan qatarliq üch dölet bilen chégralinidiken.

Xewerde bu yerning nahiye bazirigha bek yiraq bir taghliq rayon ikenliki, yerlik ahalining asasliqi charwa béqish arqiliq turmush kechüridighanliqi, shu seweblik bu jayda atalmish "Namratliqtin qutuldurush" tiki "Mustehkem istihkam urushi" ning élip bériliwatqanliqi bayan qilin'ghan.

Xewerde yene bu "Urush" ning pamir égizlikigiche kéngeygenliki qeyt qilin'ghan. Melum bolushiche, 2017-yilidin buyan xitay hökümiti tashqorghan nahiye baziridin 25 kilométir kélidighan chöl-bayawan'gha bina öydin 385 yürüshni salghan bolup, yerlik ahalini pütünley ashu "Bixeter öy" lerge yötkimekte iken.

Xewerde yene maryang yézisi, datung yézisi we weche yézisi qatarliq besh yéziningmu "Namrat taghliq rayon" katégoriyesige kiridighanliqi, bu yerdiki 1400 din artuq "Namrat charwichi" ningmu yuqirida éytip ötülgen atalmish "Bixeter öy" lerge köchürülgenliki ilgiri sürülgen.

Bu heqte pikir bayan qilghan analizchilar "Roshenki bu tajiklarni téz sür'ette özlirining yashash makanidin ayrip, assimilyatsiye qilishning yene bir usuli," déyishmekte.

Toluq bet