Uyghur diyarida wirus yuqumigha qarshi turush siyasiy wezipe qatarida qattiq ijra qilinmaqta

Uyghur diyarida ewjige chiqiwatqan tajisiman wirusi yuqumi heqqide xitay hökümitining resmiy axbarat qanalliri mushu heptidin bashlap “Wirus yuqumining kontrol qilin'ghanliqi we herqaysi jaylardiki normal ishlepchiqirish pa'aliyetlirining izigha chüshkenliki” heqqide köpligen xewerlerni bérishke bashlighan. Shu qatarda xitay hökümiti bashqurishidiki “Shinjang géziti”ning 15-noyabir sanida ili, turpan, korla, shixo qatarliq jaylarda “Yuqumning xetiri tügigen rayonlar”diki hayatning normallashqanliqi, herqaysi sahening tedriji halda ilgiriki haletke yüzliniwatqanliqi tilgha élin'ghan.

Xitay bashqurishidiki “Tengritagh tori”ning 15-noyabirdiki xewiride éytilishiche, Uyghur aptonom rayonluq partkomning sékrétari ma shingruy aldinqi küni ‍ürümchi shehrining tengritagh, bulaqtagh, saybagh qatarliq Uyghurlar merkezlik olturaqlashqan rayonlirida neq meydan tekshürishide bolghan. Bu jeryanda ma shingruy nuqtiliq qilip: “Bash sékrétar shi jinping yadroluqidiki partiye merki'izi komitétining wirus yuqumigha taqabil turush heqqidiki 20 türlük charisini qet'i izchillashturush, yuqumgha qarshi tedbirlerni qilchilikmu boshashturmastin qet'iy dawamlashturush, shu arqiliq 20-qurultayning rohini eng zor derijide izchillashturush”tek siyasiy wezipini sherhiyligen.

Ma shingruy, bir tereptin wirus yuqumni “Téz bayqash, téz emlesh we téz ayrip tekshürüsh” ni tekitlise, yene bir tereptin yuqum qamali heqqide “Ösek söz tarqatqan” herqandaq kishini qattiq jazalashni telep qilghan.

Uyghur diyaridiki üch aydin uzun'gha sozulghan qamalning bikar qilin'ghanliqi heqqide xewerler tarqiliwatqanda, ma shingruyning bu xil “Qet'iylik” heqqide yolyoruq bérishi, nöwette qattiqqolluq bilen ijra qiliniwatqan “Wirus wabasigha qarshi turush tedbirliri”ning qanchilik ijra qilinishigha qarita türlük gumanlarni tughduriwatqanliqi melum.

15-Noyabir küni Uyghur aptonom rayonluq hökümet élan qilghan melumatta éytilishiche, yéngidin bayqalghan wirus yuqumdaridin 28 kishi, alametsiz yuqumdardin 771 kishi köpeygen. Xitay hökümitining wirus yuqumi heqqidiki sanliq melumatliri izchil yalghanchiliqning misali qatarida tilgha éliniwatqan bolsimu, mushu sanlarning özi Uyghur diyaridiki yuqum ehwalining toluq kontrol qilinmighanliqini, shunga nöwettiki yuqumgha qarshi tedbirlerning dawamliq halda xelq ammisigha köpligen paji'elerni élip kélidighanliqini körsetmekte.