Xitay da'iriliri pütkül Uyghurlarning salametlik ehwalini arxiplashturup bolghan

Muxbirimiz eziz
2019-07-03
Élxet
Pikir
Share
Print

Uyghur diyarida ötken birnechche yilda toxtawsiz dawam qilghan "Heqsiz salametlik tekshürüsh" pa'aliyiti heqqide türlük melumat we xewerler otturigha chiqip kelgen idi. 2-Iyul küni xitay da'iriliri ürümchi shehiride axbarat élan qilish yighini échip, omumyüzlük salametlikni tekshürüsh xizmitining nöwettiki tereqqiyatidin doklat bergen.

"Tengritagh" torining 3-iyuldiki xewiridin melum bolushiche, 2016-yili bashlan'ghan omumyüzlük salametlik tekshürüsh pa'aliyiti üch yil dawam qilghan. Bu jeryanda 53 milyon adem qétimdin köprek salametlik tekshürüshi tamamlan'ghan bolup, buninggha aldi-keyni bolup 40 milyard som (texminen alte milyard amérika dolliri) din köprek chiqim serp bolghan.

Uda üch yil dawam qilghan omumyüzlük salametlik tekshürüsh xizmiti jeryanida alaqidar sehiye tarmaqliri "Chong sanliq melumat" téxnikisini köplep qollan'ghan. Bu jeryanda salametlik tekshürüshige qatnashqan kishilerning salametlik ehwali, késellik ehwali we bashqa fizi'ologiyelik ehwali tepsiliy tekshürülüp "Chong sandan" gha kirgüzülgen.

Axbarat élan qilish yighinida alaqidar xitay emeldarlar söz qilip, omumyüzlük salametlik tekshürüsh xizmitining muhim ehmiyitining biri "Shinjangdiki ijtima'iy muqimliq we uzun mezgillik tinchliqtek bash nishanning emilishishini zor derijide ilgiri sürüsh" ikenlikini bildürgen.

Gerche xitay da'iriliri omumyüzlük salametlik tekshürüsh xizmitini hökümetning "Xelq turmushini yaxshilash" jehettiki xizmetlirining biri qatarida teshwiq qiliwatqan bolsimu, alaqidar xewerler buning yerlik xelq bolghan Uyghurlarning salametlik ehwaligha héchqandaq menpe'et élip kelmeydighanliqini ishare qilmaqta. Muhajirettiki analizchilar bu heqte pikir qilip "Xitay hökümiti bunche zor miqdarda meblegh ajritip bikardin-bikargha Uyghurlarning salametlikini tekshürüp yürgini yoq. Ularning meqsiti Uyghurlarning bi'ologiyelik we fizi'ologiyelik uchurlirini kelgüsidiki qebih meqsetliri üchün aldin toplash," dédi.

Toluq bet