Nyu-yorktiki rochéstir uniwérsitétida Uyghurlarning ehwali heqqide doklat bérish yighini ötküzülgen

Amérikadiki köpligen uniwérsitétlarda Uyghur élide yolgha qoyuluwatqan lagér tüzümi we bashqa kishilik hoquq depsendichilikliri heqqide doklat bérilmekte.

Bulardin biri, 24-öktebir küni amérikaning nyu-york shehiridiki rochéstir uniwérsitétida ötküzülgen bolup, mezkur yighinda Uyghur kishilik hoquq qurulushi tetqiqatchisi zubeyre shemsidin we pa'aliyetchi nur iman qatarliqlar doklat bergen.

Rochéstir uniwérsitétining mektep xewerliri torida élan qilin'ghan bu heqtiki xewerdin melum bolushiche, Uyghurlar heqqidiki doklat bérish yighinini mekteptiki “Jumhuriyetchi uniwérsitét oqughuchiliri” namliq oqughuchilar uyushmisi teshkilligen iken.

Zubeyre xanim yighinda xitay hökümitining rayonda irqiy kemsitish siyasiti yürgüzüp, Uyghurlarning milliy we dini kimlikini cheklesh, ularning medeniyet iznalirini weyran qilish, 2 milyon etrapida Uyghur qatarliq milletlerni lagérgha qamashtek qilmishlar bilen shughulliniwatqanliqini chüshendürüp ötken. Nur'iman qatarliqlarmu özlirining 2017-yilidin béri a'ilisi bilen bolghan alaqisi pütünley üzülgenliktin tolimu éghir rohiy bésim astida qalghanliqini bayan qilghan.

Xewerde éytilishiche, doklat bérish yighini oqughuchilarning qizghin qollishigha érishken bolup, oqughuchilar birdek özlirining Uyghurlar üchün néme qilip béreleydighanliqini, bu kirizisni toxtitish üchün qandaq heriket qilishi kérekliki heqqide so'allarni sorighan iken.

Oqughuchilardin beziliri mektep gézitige qilghan sözide: “Özlirining ilgiri Uyghurlarni anglap baqmighanliqini emma bügün bu yerde anglighanlirini bashqilarghimu yetküzüp bu heqte téximu köp kishilerning tonushini östürüshke tirishidighanliqi” ni bildürgen.