Ню-йорктики рочестир университетида уйғурларниң әһвали һәққидә доклат бериш йиғини өткүзүлгән

Мухбиримиз ирадә
2019-11-05
Елхәт
Пикир
Share
Принт

Америкадики көплигән университетларда уйғур елидә йолға қоюлуватқан лагер түзүми вә башқа кишилик һоқуқ дәпсәндичиликлири һәққидә доклат берилмәктә.

Булардин бири, 24-өктәбир күни американиң ню-йорк шәһиридики рочестир университетида өткүзүлгән болуп, мәзкур йиғинда уйғур кишилик һоқуқ қурулуши тәтқиқатчиси зубәйрә шәмсидин вә паалийәтчи нур иман қатарлиқлар доклат бәргән.

Рочестир университетиниң мәктәп хәвәрлири торида елан қилинған бу һәқтики хәвәрдин мәлум болушичә, уйғурлар һәққидики доклат бериш йиғинини мәктәптики «җумһурийәтчи университет оқуғучилири» намлиқ оқуғучилар уюшмиси тәшкиллигән икән.

Зубәйрә ханим йиғинда хитай һөкүмитиниң районда ирқий кәмситиш сиясити йүргүзүп, уйғурларниң миллий вә дини кимликини чәкләш, уларниң мәдәнийәт изналирини вәйран қилиш, 2 милйон әтрапида уйғур қатарлиқ милләтләрни лагерға қамаштәк қилмишлар билән шуғуллиниватқанлиқини чүшәндүрүп өткән. Нуриман қатарлиқларму өзлириниң 2017-йилидин бери аилиси билән болған алақиси пүтүнләй үзүлгәнликтин толиму еғир роһий бесим астида қалғанлиқини баян қилған.

Хәвәрдә ейтилишичә, доклат бериш йиғини оқуғучиларниң қизғин қоллишиға еришкән болуп, оқуғучилар бирдәк өзлириниң уйғурлар үчүн немә қилип берәләйдиғанлиқини, бу киризисни тохтитиш үчүн қандақ һәрикәт қилиши керәклики һәққидә соалларни сориған икән.

Оқуғучилардин бәзилири мәктәп гезитигә қилған сөзидә: «өзлириниң илгири уйғурларни аңлап бақмиғанлиқини әмма бүгүн бу йәрдә аңлиғанлирини башқиларғиму йәткүзүп бу һәқтә техиму көп кишиләрниң тонушини өстүрүшкә тиришидиғанлиқи» ни билдүргән.

Пикирләр (0)
Share
Толуқ бәт