2023-Yilliq xizmet doklatida Uyghur élidiki assimilyatsiye siyasetlirining muweppeqiyetliri nuqtiliq gewdilen'gen

Xitay xelq siyasiy meslihet kéngishi shinjang Uyghur aptonom rayonluq komitéti da'imiy komitétining 2023-yilliq xizmet doklatida xitay hökümiti “Jungxu'a milliti ortaq gewdisi éngini turghuzush” dep atawatqan, emma chet ellerdiki Uyghur kishilik hoquq pa'aliyetchiliri teripidin xitaylashturush we assimilyatsiye siyasiti dep qariliwatqan xizmetlerning muweppeqiyetliri nuqtiliq gewdilen'gen.

2023-Yilidiki xizmetlerge a'it doklatning toluq tékisti xitayning tengritagh torida 13-féwral küni élan qilin'ghan. Bu doklatta déyilishiche, 2023-yilida Uyghur élida “Jungxu'a milliti ortaq gewdisi éngini mustehkemlesh telipi qet'iy izchillashturulup, köp xil shekillik ‛milletler ittipaqliship bir a'ile kishiliridin bolush‚ we milletler ittipaqliqi birleshme dostluq pa'aliyetliri keng qanat yaydurulghan. Her millet ammisining bérish-kélish qilish, naxsha-muzika orunlash, jem bolush-mungdishish dawamida chongqur arilishishi, almashturushi, yughurulushigha türtke bolun'ghan. ”

Siyasiy kéngesh shinjang Uyghur aptonom rayonluq 13-nöwetlik komitétining da'imiy komitétigha wakaliten bu doklatni oqup ötken, siyasiy kéngesh re'isi, qazaq millitidin bolghan nurlan ebilmejin milletlerning yughurulushi, her milletning jungxu'a milliti ortaq gewdisi éngining kücheytilgenliki we jungxu'a rohining mustehkemlen'genlikini tekitligen.

Doklatta yene, rayonda din ishlirini qanun boyiche bashqurup, esebiylikke zerbe bérilgenliki, dinning xitayche sotsiyalizmgha maslashturulghanliqi qeyt qilin'ghan.

Doklatta siyasiy kéngeshning ötken yildiki xizmetlirining amérikida maqullan'ghan “Uyghur mejburiy emgikining aldini élish qanuni” qatarliq Uyghurlargha a'it qanunlarni eyiblesh, amérikani qarilashning asasliq nuqta bolghanliqi körsitilish bilen birge 2024-yilliq xizmetlirining aldinqi qatarida yenila jungxu'a milliti ortaq gewdisi éngini kücheytish bolidighanliqi eskertilgen.

Xitay hökümiti ötken bir yil mabeynide chet ellerge qarita türlük teshwiqat heriketliri élip bérish arqiliq Uyghur élida Uyghurlarning öz milliy we diniy örp-adetliri boyiche yashishigha kapaletlik qiliwatqanliqini tekitlep, Uyghurlargha irqiy qirghinchiliq we insaniyetke qarshi jinayet ötküzgenlikini ret qilip kelgen.