Америкадики хитай оқуғучи: «уйғурлар әркин қоюветилсә, хитай хәлқиниң хатирҗәмлики бузулиду»

Мухбиримиз шөһрәт һошур
2019-03-07
Елхәт
Пикир
Share
Принт

Америкадики вашингитон дөләтлик ониверситетиниң тор бетидә хәвәр қилинишичә, өткән айниң 28‏-күни 5 нәпәр уйғуршунас мәзкур ониверситет уюштурған уйғур вәзийити һәққидики бир муһакимә йиғиниға қатнишип пикир баян қилған.

Хәвәрдә әскәртилишичә, оқутқучи, оқуғучи вә тәтқиқатчилар болуп, 120 киши қатнашқан бу йиғинда икки нәпәр хитай оқуғучиниң уйғур вәзийити һәққидики баянлири йиғин әһлини қаттиқ әҗәбләндүргән.

Мәлум болушичә, йиғинниң соал-җаваб қисмида муназиригә қетилған икки нәпәр хитай оқуғучидин уйғурларға бираз әркинлик берилишниң немә зийини барлиқи соралған. Бу иккийлән бәргән җавабида уйғурларға көпрәк әркинлик берилсә хитай хәлқиниң бихәтәрликигә хәвп йетидиғанлиқи има қилинған. Хәвәрдә дейилишичә, бу икки оқуғучи мәзкур җавабни бәргәндин кейин, йиғин мәйданидин дәрһал айрилип, ғайиб болған.


Муһаҗирәттики уйғурлар уйғур районида милйонлиған инсанлар хитайниң йиғивелиш лагерлириға соливелинған бир вәзийәттә уйғур райондики хитай пуқралириниң бу вәзийәткә һечқандақ наразилиқ билдүрмәйватқанлиқи, чәтәлдики хитай демократчилириниңму мәсилигә қарита инкаслириниң йетәрлик болмайватқанлиқидин әҗәблинип келиватқан иди.

Хәвәрдә дейилишичә, бу йиғинда дәррен байлер, гарденер бовиңдон, рачел һаррис, скон тайсон вә әзиз әйса әлкүн қатарлиқ мутәхәссисләр уйғур вәзийити вә уйғур районидики йиғивелиш лагерлири һәққидики тәтқиқатлирини оттуриға қойған.

Пикирләр (0)
Share
Толуқ бәт