Уйғурларниң ген учурлирини топлиған хитай ширкитигә қарши “бийо-техника хәвпсизлики қанун лайиһәси” тонуштурулған

Вашингтондин мухбиримиз җәвлан тәйярлиди
2024.05.15

Америка дөләт мәҗлиси әзаси, америка-хитай риқабити алаһидә комитетиниң юқири дәриҗилик әмәлдари раҗа киришнаморти йеқинда дөләт мәҗлисигә “бийо-техника хәвпсизлики қанун лайиһәси” ни тонуштурған болуп, бу һәқтә у X  һесабида йоллиған учурида мундақ дәп язған: “уйғурларни експлататсийә қилиш кишилик һоқуққа хилап һәрикәт болуп, униңға көңүл бөлүш керәк. 5-Айниң 10-күни мән ‛бийо-техника хәвпсизлики қанун лайиһәси‚ ни тонуштурдум. Буниңдики мәқсәт,  уйғурларни хитайниң хуада генлири гуруһи (BGI) ширкитиниң зиянкәшликигә учраштин сақлаш; чүнки бу ширкәт уйғурларниң генлириға аит санлиқ мәлуматларни топлап, хитай компартийәсигә тәминләп бериду”.

Киришна муртиниң бу һәқтә ейтқан сөзигә қариғанда, хитайниң хуада генлири гуруһи уйғур вә башқа аз санлиқ милләтләрниң ген учурлирини топлап, уларни башқилардин пәрқләндүрүш, башқа нопустин айриветиш һәмдә уларни из қоғлап тәкшүрүш үчүн ишлитидикән.  Бу ширкәт йәнә ғәрбниң бәзи бийо-техника ширкәтлири билән һәмкарлишиш җәрянида уларниң техникисини оғрилап, хитайға йәткүзүп беридикән. Бу ширкәтниң йәнә хитай армийәси билән һәмкарлиқи күчлүк болуп, дуняниң һәр қайси җайлиридин топлиған инсан генлири билән “алаһидә әскәр” барлиққа кәлтүрүшкә урунмақтикән. Уларниң алаһидә ген билән һамилә қалдуруш синақлириға аит учурлардин қариғанда, улар дуняниң һәр қайси җайлирида 8 милйон қетим синақ елип барған һәм һечқандақ аялниң рухситини алмиған әһвалда барлиқ учурларни хитайниң дөләтлик ген амбириға йоллап бәргән. Уларниң ғәризи дуняниң бийо-техника саһәсидә үстүнлүкни игиләш икән.

Раҗа киршнаморти мундақ дегән: “хитай 2035-йилиға барғанда дуня бийо-техникисиниң хоҗисиға айлинидиғанлиқини ениқ билдүрди һәм шу нишанға қарап тәрәққий қиливатиду. Буниң үчүн улар бир яқтин әқлий мүлүк һоқуқини оғрилиса, бир яқтин башқа ишларниму қиливатиду. Биз бу саһәдә һазир қайси һалға чүшүп қалдуқ?”

У сөзидә, американиң бийо-техника саһәсидә өзини қоғдашқа тегишлик барлиқ техника, үскүнә вә ген учурлирини мәһкәм қоғдиши керәкликини, уни хитайдәк дүшмәнниң қолиға тутқузуп қоймаслиқни тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.