Uyghurlarning gén uchurlirini toplighan xitay shirkitige qarshi “Biyo-téxnika xewpsizliki qanun layihesi” tonushturulghan

Washin'gtondin muxbirimiz jewlan teyyarlidi
2024.05.15

Amérika dölet mejlisi ezasi, amérika-xitay riqabiti alahide komitétining yuqiri derijilik emeldari raja kirishnamorti yéqinda dölet mejlisige “Biyo-téxnika xewpsizliki qanun layihesi” ni tonushturghan bolup, bu heqte u X  hésabida yollighan uchurida mundaq dep yazghan: “Uyghurlarni éksplatatsiye qilish kishilik hoquqqa xilap heriket bolup, uninggha köngül bölüsh kérek. 5-Ayning 10-küni men ‛biyo-téxnika xewpsizliki qanun layihesi‚ ni tonushturdum. Buningdiki meqset,  Uyghurlarni xitayning xu'ada génliri guruhi (BGI) shirkitining ziyankeshlikige uchrashtin saqlash؛ chünki bu shirket Uyghurlarning génlirigha a'it sanliq melumatlarni toplap, xitay kompartiyesige teminlep béridu”.

Kirishna murtining bu heqte éytqan sözige qarighanda, xitayning xu'ada génliri guruhi Uyghur we bashqa az sanliq milletlerning gén uchurlirini toplap, ularni bashqilardin perqlendürüsh, bashqa nopustin ayriwétish hemde ularni iz qoghlap tekshürüsh üchün ishlitidiken.  Bu shirket yene gherbning bezi biyo-téxnika shirketliri bilen hemkarlishish jeryanida ularning téxnikisini oghrilap, xitaygha yetküzüp béridiken. Bu shirketning yene xitay armiyesi bilen hemkarliqi küchlük bolup, dunyaning her qaysi jayliridin toplighan insan génliri bilen “Alahide esker” barliqqa keltürüshke urunmaqtiken. Ularning alahide gén bilen hamile qaldurush sinaqlirigha a'it uchurlardin qarighanda, ular dunyaning her qaysi jaylirida 8 milyon qétim sinaq élip barghan hem héchqandaq ayalning ruxsitini almighan ehwalda barliq uchurlarni xitayning döletlik gén ambirigha yollap bergen. Ularning gherizi dunyaning biyo-téxnika saheside üstünlükni igilesh iken.

Raja kirshnamorti mundaq dégen: “Xitay 2035-yiligha barghanda dunya biyo-téxnikisining xojisigha aylinidighanliqini éniq bildürdi hem shu nishan'gha qarap tereqqiy qiliwatidu. Buning üchün ular bir yaqtin eqliy mülük hoquqini oghrilisa, bir yaqtin bashqa ishlarnimu qiliwatidu. Biz bu sahede hazir qaysi halgha chüshüp qalduq?”

U sözide, amérikaning biyo-téxnika saheside özini qoghdashqa tégishlik barliq téxnika, üsküne we gén uchurlirini mehkem qoghdishi kéreklikini, uni xitaydek düshmenning qoligha tutquzup qoymasliqni tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.