“Xitayning Uyghurlargha qarshi urushi” namliq eser neshrdin chiqti

Xitay hökümitining Uyghurlar diyaridiki siyasiy basturush we zor kölemlik tutqun herikiti xelq'arada tedrijiy halda “Yéngi qirghinchiliq” dep qarilishqa bashlighanda bu heqtiki ehwallarni téximu tepsiliy sherhiligen “Uyghurlargha qarshi urush: xitayning musulman az sanliq milletlirige qaratqan ichki kürishi” namliq eser prinsiton uniwérsitéti neshriyatida neshr qilindi.

Washin'gton shehiridiki jorj washin'gton uniwérsitétining dotsénti, Uyghurshunas shan robértsning birnechche yilliq izdinishlirining mehsuli bolghan mezkur eser mushu sahede yéqinqi mezgillerde barliqqa kelgen yirik eserlerning biri hésablinidu. Aptor esiride xitay hökümitining “11-Séntebir weqesi” din kéyin tézdin özlirini “Térrorluqning qurbanliri” dep perdazlap, dunyawi miqyastiki térrorluqqa qarshi dolqun'gha suqunup kiriwalghanliqi hemde mushu bahanide özlirining Uyghurlarni wehshiyane basturush qilmishlirini aqlashqa urunup kelgenlikini tepsiliy bayan qilidu.

“Diplomat” zhurnili bu munasiwet bilen mexsus söhbet uyushturup, doktor shan robértsqa bu heqtiki bir qatar so'allarni sundi. Shan robérts bu qétimliq söhbette téximu tepsiliy qilip Uyghurlarning emeliyette térorluqtin tolimu yiraq bir xelq ikenliki, xitay hökümitining Uyghurlarni basturush qilmishi tüpeylidin axiri bir türküm Uyghurlarning öz awazini anglitish üchün xitay hökümitige qarshi zorluq wasitisini qollinish yoligha mangghanliqi, buning bilen xitay hökümitining neziride “Döletning düshmini” dep qarilishqa bashlighan Uyghurlar heqqide xitayning xelq'ara jem'iyetke bu heqte köpligen teshwiqat uchurlirini yollighanliqini bayan qildi.