Нотердам университетида уйғурлар һәққидә муһакимә йиғини чақирилди

Мухбиримиз әзиз
2020-09-15
Елхәт
Пикир
Share
Принт

Американң индияна штатидики нотердам университетида 14-сентәбир күни мәхсус уйғурларға беғишланған муһакимә йиғини чақирилип, нөвәттики уйғурлар дуч келиватқан иҗтимаий киризислар вә бу һәқтә қилишқа тегишлик паалийәтләр музакирә қилинди.

Муһакимә йиғиниға лондон университетиниң профессори рәйчел харрис, җорҗ тавн университетиниң профессори җеймис милвард вә нотер дам университетиниң дотсенти пәрин гүрәл қатарлиқлар пикир баян қилди.

Профессор рәйчел харрис өзиниң өткән 20 нәччә йил мабәйнидә көп қетимлап уйғурлар дияриға барғандики тәсиратиға бирләштүргән һалда у җайдики вәзийәт вә сиясий контроллуқниң һәр қетим көргинидә бурунқидин бир балдақ юқирилап маңғанлиқини, әмдиликтә болса бу хил сиясий контроллуқниң аллиқачан қирғинчилиқ вә мәҗбурий әмгәк басқучиға көтүрүлүп болғанлиқини тәкитлиди. Шуниңдәк бу қәдәр зор көләмлик бастуруш тәдбирлириниң ғәрәзлик иҗра болуши аллиқачан ташқи дуняни ойғатқудәк сәвийигә йәткәнликини көрситип «хитайларниң кишиләр кәмдин-кәм аяқ басидиған чәт-яқа җайлардики мазарларни түзливетишиниң өзила буниңдики мәқсәдниң уйғурға тәәллуқ җимий нәрсини йәр йүзидин йоқ қилиш икәнликидин бешарәт бериду» деди.

Профессор җим милвард болса асаслиқи хитай һөкүмитиниң йиғивелиш лагери, мәҗбурий туғмас қиливетиш вә мәҗбурий әмгәк сиясити һәққидә тохталди. Шуниңдәк америка-хитай мунасивитидә уйғурлар мәсилисини чөридигән һалда оттуриға чиққан сөһбәтләр һәққидә мәлумат бәрди.

Ахирида сөз алған пәрин гүрәл асаслиқи уйғурлар дуч келиватқан иҗтимаий паҗиәләр ташқи дуняға көпләп мәлум болғандин кейин хәлқарада барлиққа кәлгән бу һәқтики инкаслар, җүмлидин ислам әллири вә түркийә һөкүмиитиниң бу мәсилидики мәвқәси һәққидә сөз қилди.

Пикирләр (0)
Share
Толуқ бәт