Notérdam uniwérsitétida Uyghurlar heqqide muhakime yighini chaqirildi

Muxbirimiz eziz
2020.09.15

Amérikanng indiyana shtatidiki notérdam uniwérsitétida 14-séntebir küni mexsus Uyghurlargha béghishlan'ghan muhakime yighini chaqirilip, nöwettiki Uyghurlar duch kéliwatqan ijtima'iy kirizislar we bu heqte qilishqa tégishlik pa'aliyetler muzakire qilindi.

Muhakime yighinigha london uniwérsitétining proféssori reychél xarris, jorj tawn uniwérsitétining proféssori jéymis milward we notér dam uniwérsitétining dotsénti perin gürel qatarliqlar pikir bayan qildi.

Proféssor reychél xarris özining ötken 20 nechche yil mabeynide köp qétimlap Uyghurlar diyarigha barghandiki tesiratigha birleshtürgen halda u jaydiki weziyet we siyasiy kontrolluqning her qétim körginide burunqidin bir baldaq yuqirilap mangghanliqini, emdilikte bolsa bu xil siyasiy kontrolluqning alliqachan qirghinchiliq we mejburiy emgek basquchigha kötürülüp bolghanliqini tekitlidi. Shuningdek bu qeder zor kölemlik basturush tedbirlirining gherezlik ijra bolushi alliqachan tashqi dunyani oyghatqudek sewiyige yetkenlikini körsitip “Xitaylarning kishiler kemdin-kem ayaq basidighan chet-yaqa jaylardiki mazarlarni tüzliwétishining özila buningdiki meqsedning Uyghurgha te'elluq jimiy nersini yer yüzidin yoq qilish ikenlikidin bésharet béridu” dédi.

Proféssor jim milward bolsa asasliqi xitay hökümitining yighiwélish lagéri, mejburiy tughmas qiliwétish we mejburiy emgek siyasiti heqqide toxtaldi. Shuningdek amérika-xitay munasiwitide Uyghurlar mesilisini chöridigen halda otturigha chiqqan söhbetler heqqide melumat berdi.

Axirida söz alghan perin gürel asasliqi Uyghurlar duch kéliwatqan ijtima'iy paji'eler tashqi dunyagha köplep melum bolghandin kéyin xelq'arada barliqqa kelgen bu heqtiki inkaslar, jümlidin islam elliri we türkiye hökümi'itining bu mesilidiki mewqesi heqqide söz qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.