«Уйғур һәрикити» тәшкилати «Netflix» ни хитай язғучи лю чисән билән һәмкарлашмаслиққа чақирди

Мухбиримиз ирадә
2020-09-03
Елхәт
Пикир
Share
Принт

«Уйғур һәрикити» тәшкилати америкадики интернет медийә суписи «Netflix» кә баянат елан қилип, уни хитай язғучи лю чисин билән һәмкарлишишни тохтитишқа чақирди.

Улар хитай язғучиси лю чисинниң хитай һөкүмити уйғур елидә йолға қоюватқан ирқий қирғинчилиқ сиясити вә җаза лагерлирини қоллайдиған бир шәхсиликини тәкитлигән вә униң бир қетимлиқ сөзидә хитайниң уйғур елидә зулум йүргүзүватқанлиқини инкар қилип: «әгәр у йәрдә һәқиқәтән бир мәсилә бар дейилсә, у һалда у һөкүмитимизниң уларниң иқтисадиға ярдәм берип, уларни намратлиқтин қутулдурмақчи болуватқанлиқидур,» дегәнликини әскәрткән.

9-Айниң 1-күни «һолливод гезити» хәвәр тарқитип, «Netflix» ширкитиниң юқириқи бу хитай язғучи билән униң бир илмий фантазийилик романини сенарийәләштүрүп филим ишләш һәққидә келишим түзгәнликини елан қилған икән. «Уйғур һәрикити» тәшкилати баянатида уларни бу қарарини көздин кәчүрүшкә чақирип: «ирқий қирғинчилиқни қоллайдиған бир шәхс бундақ келишимләр арқилиқ тартуқландурулмаслиқи керәк,» дегән. Мәзкур тәшкилатниң башлиқи рошән аббас ханим баянатта: «әгәр бир аптор натсистлар германийәсиниң 6 милйон йәһудийға қаратқан чоң қирғинчилиқини ақлиса вә уни қоллиса, Netflix йәнила бурунқидәк униң билән келишим түзәләмти? хитай һөкүмитиниң уйғурларға қаратқан ирқий қирғинчилиқини ақлиған апторни қоллаштин сақлиниш һәммәйләнгә ортақ адәткә айлиниши керәк, бундақ шәхсниң әсирини филим қилип ишләшни таллаш җинайәткә шерик болғанлиқ, дәп қарилиши керәк» дәп әскәрткән.

Мәзкур тәшкилат ахирида Netflix шеркитини бу хитай язғучи билән түзгән келишимини дәрһал бикар қилишқа чақирған.

Пикирләр (0)
Share
Толуқ бәт