Uyghur élidiki bulghinish xitaydiki eng bulghan'ghan rayonlardinmu yamanliship kétidiken

Muxbirimiz jüme
2016-06-19
Share


Bash shtabi london'gha jaylashqan bir ékologiyelik muhit xewerler torining 17 - iyun körsitishiche, yéqin kelgüside Uyghur éli hawasidiki bulghinish derijisi xitaydiki eng bulghan'ghan xébéy ölkisining aldigha ötüp kétishi mumkin iken.

"Xitay di'alogi" torining dunya sehiye teshkilati ötken ayda élan qilghan xitaydiki eng bulghan'ghan sheherler tizimlikidin neqil élip körsitishiche, nöwette xitay eng bulghan'ghan 5 sheherning hemmisi xébéy ölkisige jaylashqan iken.

Tor bet xitaydiki muhit mesililirini asasliq közitish we xewer qilish obyékti qilghan bolup, ular xitaygha a'it muhit we bulghinish uchurlirini izchil yéngilap turidu.

Xewerge qarighanda, xitay da'iriliri 2013 - yilidin bashlap béyjing, tyenjin we xébéy qatarliq sheher - rayonlarda bulghinishqa qarishi yolgha qoyghan tedbirler bara - bara kargha kélishke bashlighan bolsimu, emma xitayning gherbiy shimalidiki bulghinish derijisi bu sheherlerning ornini élishqa bashlighan. Mesilen nöwette lenju shehiri bulghinish jehette xébéyning burunqi halitige kélip qalghan bolsa, xébéyning hawa süpiti yaxshilinishqa qarap yüzlen'gen.

Ularning körsitishiche, b d t sehiye teshkilatining doklati 2014 - yilidiki sanliq melumatlargha asasen hazirlan'ghan bolghachqa, doklatta uningdin kéyinki özgirishler heqqide melumatlar toluq emes iken.

Xewerde mundaq déyilgen: "Bezi közetküchilerning mölchiriche, nöwettiki sür'et boyiche xitay sheherliri sehiye teshkilatining tizimlikidin bara - bara chüshüp qélishi mumkin. Emma, bezi obzorchilar agahlandurghandek hawa süpitining yamanlishigha egiship xitayning gherbiy shimalidiki shinjang kelgüsidiki chong riqabetke aylinidighandek qilidu."

Halbuki xewerge qarighanda, xitay hökümiti yolgha qoyghan hawa süpitini östürüsh we bulghinishning aldini élish tedbirliri yuqiriqi chong sheherlirige sélishturghanda Uyghur élide xélila keynide qalghan.

Hetta xitay hökümiti 2016 - yilining deslepki charikide élan qilghan doklattimu ürümchi shehiri eng bulghan'ghan sheher tizimning birinchi rétidin orun alghan bolsa, xitayning xébéy ölkisige qarashliq bawtong we shingtey sheherliri ürümchining keynige tizilghan.

Dunya sehiye teshkilatining ölchimi boyiche hawadiki zeherlik ushshaq zerrichiler MP 2.5 Qimmiti boyiche hésablinidu. Uningda her kubmétir hawada diki MP 2.5 Bulghima zerrichiler 10 mikrogramdin éship ketmesliki, yaki uningdin towen bolushi kérek, dep belgilen'gen.

"Yéshil tinchliq teshkilati" 20 - apiril élan qilghan doklatidimu xitaydiki hawa bulghinishning gherbiy sheherlerge qarap köchüwatqanliqini, qeshqer we xotenning xitaydiki eng bulghan'ghan sheherler tizimlikining töridin orun alghanliqini körsetken.

Ular élan qilghan sanliq melumatta qeshqerning her kubmétir hawasidiki MP 2.5 Bulghima zerrichiler 276.1 Mikrogram bolup, buning aldinqi yilning oxshash mezgildikidin 99 pirsent ashqanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet