Xitay hökümiti ikki Uyghur emeldarni iqrar qildurush arqiliq Uyghur rayonidiki siyasitining toghra ikenlikini teshwiq qilghan

Muxbirimiz jewlan
2021-04-07
Share

Xitay hökümiti Uyghur aptonom rayonluq ma'arip nazaritining sabiq naziri sattar sawut bilen edliye nazaritining sabiq naziri shirzat bawudunni "Bölgünchilik jinayiti" bilen eyiblep, ikki yil kéchiktürüp ijra qilinidighan ölüm jazasigha höküm qilghanidi. Xitayning qanuni boyiche, bundaq jinayetchilerning ikki yil ichide ipadisi yaxshi bolsa jazasi yenggillep, muddetsiz qamaqqa höküm qilinidighanliqi melum.

"Amérika agéntliqi" torining 7-aprél bergen xewiridin melum bolushiche, xitay hökümiti irqiy qirghinchiliq jinayiti bilen eyiblen'gendin kéyin, bu ikki emeldarni qayta kötürüp chiqip, ularni "Wetenni parchilashqa urun'ghanliqi" heqqide iqrar qildurup, pütün jahan'gha sazayi qilish arqiliq Uyghur rayonidiki basturush siyasitini aqlimaqchi bolghan.

Xitay taratqulirining teshwiq qilishiche, sattar sawut "Milliy bölgünchilik éngi peyda qilidighan" derslik kitab tüzüshke yétekchilik qilghan we bu kitablar Uyghurlarni "13 Yil zeherligen". Shirzat bawudun bolsa "Sherqiy türkistan islam herikiti" bilen alaqe ornatqan, yerlik diniy esebiy küchlerge yardem bergen. Bularning her ikkisi öz hoquqidin paydilinip, idiye we herikette milliy bölgünchilik bilen shughullan'ghan xeterlik unsurlar iken.

Közetchilerning qarishiche, xitay hökümiti bu ikki Uyghur emeldarni bir qolluq terbiyelep yétishtürgen bolup, ularning xitay hökümitining siziqidin chiqmay turup undaq ishlarni qilalishi mumkin emes iken. Közetküchilerning qarishiche, xitay kommunist hökümiti éhtiyaji bolghanda ulardin paydilinidiken, éhtiyaji tügigende ularni öz menpe'eti üchün qurbanliq qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet