ئۇيغۇر كىشىلىك پروگراممىسى خىتاينىڭ ئىسىم چەكلىمىسىدىن چۆچۈگەنلىكىنى بىلدۈردى

ئامېرىكىدىكى ئۇيغۇر كىشىلىك تەتقىقات ئورنى خىتاي ھۆكۈمىتى ئۇيغۇر ئېلىدە يولغا قويغان ئىسلامىي ئىسىملارنى مەنئى قىلىش قاتارلىق دىنىي چەكلىمىلەردىن چۆچۈگەنلىكىنى بىلدۈردى.

ئامېرىكا ئۇيغۇر كىشىلىك ھوقۇق پروگراممىسى 4-ماي ئېلان قىلغان باياناتىدا، خىتاي چىقارغان بۇ بىر قاتار بەلگىلىمىلەردىن ھۆكۈمەت دائىرىلىرىنىڭ ئۇيغۇرلار ھاياتىنىڭ ھەر بىر قاتلىمىغىچە كونترول قىلىشقا تەرەددۇت قىلغانلىقىنى كۆرۈۋالغىنى بولىدىغانلىقىنى كۆرسەتتى.

دوكلاتتا مۇنداق دېيىلدى: «ھەر بىر ئۇيغۇر، ھەر بىر ئۇيغۇر ئائىلىسى ۋە ئۇيغۇر جەمئىيىتىنىڭ شەخسىيىتىگە قەدەر دەخلى قىلىش دۆلەت بەلگىلەپ بەرگەن كىملىكنى ئۇيغۇرلارغا سىڭدۈرۈشنى مەقسەت قىلىدۇ.»

خىتاي دائىرىلىرى ئۆتكەن ئاينىڭ ئاخىرى بىر ئۇقتۇرۇش چىقىرىپ، ئۇيغۇر ئېلىدە «مۇھەممەت»، «مەدىنىدە»، ۋە «تۈركىزات» قاتارلىق 29 ئىسىمنى «دىنىي ئەسەبىيلىكنى تەرغىب قىلىدۇ» دەپ كۆرسىتىپ، يېڭى تۇغۇلغان بوۋاقلارغا قويۇشنى چەكلىگەن.

مەزكۇر ئۇقتۇرۇش خەۋەر قىلىنغاندىن كېيىن دۇنيا خاراكتېرلىك قىزىق نۇقتىغا ئايلانغان ئىدى.

بۇ ھەقتە توختالغان پروگرامما دىرېكتورى ئۆمەر قانات مۇنداق دېدى: «ئۇيغۇرلارنىڭ بەزى ئىسىملارنى ئىشلىتىشتىن توسۇلۇشى ئۇيغۇر مەدەنىيىتىگە قىلىنغان ئېغىر ھاقارەت. خىتاي ھۆكۈمىتى چەكلىگەن بۇ ئىسىملار ئۇيغۇرلار ئەسىرلەردىن بۇيان ئىشلىتىپ كېلىۋاتقان ئىسىملار بولۇپ، بۇلار ئۇيغۇرلارغا ھەرگىزمۇ يات ئەمەس.»

ئۇ يەنە، كىيىم كىيىش ئۆلچەملىرى، ئىسىم چەكلىمىسى قاتارلىقلارنىڭ ئەمەلىيەتتە بىكاردىن بىكار ئۇيغۇرلارنىڭ چىشىغا تېگىشتىن باشقا نەرسە ئەمەسلىكىنى كۆرسەتكەن ۋە خىتاي ھۆكۈمىتىنى ئۇيغۇرلارنىڭ كۆزىگە كىرىۋېلىشىنىڭ ئورنىغا، ئۇيغۇرلارغا قارىتىلغان ئىقتىسادىي يەكلىمىچىلىك ۋە سىياسىي باستۇرۇشقا خاتىمە بېرىشكە چىرقىرىغان.