Әнгилийәлик уйғуршунас рейчел һарресниң “уйғур ‍исламиниң авазлиқ көрүнүшлири” намлиқ китаби “британийә етно-музикашунаслиқ мукапати” ға еришкән

Әнгилийәлик уйғуршунас, етник музика тәтқиқатчиси, лондон университети шәрқшунаслиқ вә африқа тәтқиқат иниститутиниң профессори рейчел һарресниң “уйғур ‍исламиниң авазлиқ көрүнүшлири” намлиқ китаби “британийә етно-музикашунаслиқ мунбири мукапати” ға еришкән. Бу орунниң 16-июн елан қилған бу һәқтики уқтурушида, “биз рейчел һарресниң 2020-йили нәшр қилинған ‛уйғур исламиниң авазлиқ көрүнүшлири‚ намиқ китабиниң 2022-йиллиқ ‛британийә етно-музикашунаслиқ мунбири мукапати‚ ға еришкәнликини хошаллиқ илкидә елан қилидуқ,” дейилгән.

Мәзкур орунниң уқтурушида ейтишиличә, “хитайниң ғәрбий-шималидики вәзийити наһайити кәскин болған шинҗаң уйғур аптоном райониниң ичи вә сиртидики софизм еқимидики мусулманларни чиқиш нуқтиси қилған бу китап, көп қатламлиқ, хетерофоник, йәни икки яки униңдин артуқ аваз билән йәккә мелодийәдә мустәқил өзгириш һәм маслишиш һасил қилидиған аваз мәнзирилириниң көп қирлиқ етнографийәсигә вәкиллик қилидикән”.

Уқтурушта йәнә апторниң “җәсурлиқ билән дәл вақтида инчикә көзитиш елип берип, аваз өзгириши, собйектиплиқ, вәкиллик характер вә күч тоғрисидики мол етно-музикашунаслиқ тәтқиқатини тарих, сиясәт вә дин билән муҗәссәмлүштүргәнлики” тәкитләнгән.

Профессор рейчел һарресниң уйғур софизимлиқ музика сәнити вә әдәбиятиға беғишланған бу китаби, юқири қурулмилиқ һаләттә мундақ төт мәсилини асаслиқ нуқта қилған, йәни һикмәт ейтиш, қуран тилавәт қилиш, тавушларниң чәк-чеграси вә әсәрләрниң дәврий айлинишини асас қилған. Мәлум болушичә, бу китап профессор һарресниң уйғур райони, қазақистан вә муһаҗирәттики уйғур топлуқлири арисида елип барған узун йиллиқ тәкшүрүш һәм тәтқиқатниң нәтиҗиси болуп, 2020-йили америкадики индияна университети нәшрияти тәрипидин нәшр қилинған икән.