Uyghur élide “Tüzümge xilapliq qilghan” ikki Uyghur emeldar teptish da'irilirining bir terep qilishigha tapshurup bérilgen

Xitay da'iriliri Uyghur élide atalmish merkezning 8 xil tüzümi we qanun'gha “Xilapliq qilghan” ikki Uyghur emeldarini teptish da'irilirining tekshürüp bir terep qilishigha tapshurup bergen. Uyghur aptonom rayonluq intizam tekshürüsh we réwiziye komitétining 5-dékabir élan qilishiche, yeken nahiyelik xelq qurultiyining mudiri, nahiyelik partkomning mu'awin sékrétari muxter hesen bilen xoten wilayetlik öy qurulushi idarisining bashliqi, partiye guruppisining mu'awin sékrétari turdimemet rozi partiyedin qoghlap chiqirilip, xizmitidin boshitilghan.

Uyghur aptonom rayonluq intizam tekshürüsh we réwiziye komitétining uqturushida, muxter hesen bilen turdimemetning atalmish intizam we qanun'gha xilap ‍éghir qilmishliri seweblik partiyedin qoghlap chiqirilip, xizmitidin boshitilghanliqi, shundaqla shundaqla “Jinayi mesililer” ge chétilip, teptish ‍organlirining qanuni jawabkarliqqa tartishigha tapshurup bérilgenlikini bildürülgen.

Uqturushta, muxter hesenning bashqurush mulazimet obyékti we qol astidikilerning jem'iy 12 ming 800 yüen qimmitidiki sowghisini qobul qilghanliqi, turdimemet rozining 460 ming 260 yüen qimmitide sowghat qobul qilip, ‍idarisining aptomobilini köp qétim uruq-tughqan, dost yarenlirining ishlirigha ishletkenliki qeyt qilin'ghan bolsimu, lékin ularning jinayi jawabkarliqqa tartilishigha seweb bolghan konkrét qandaq “Jinayi mesililer” ge chétilghanliqi tilgha élinmighan.

Xitay hökümiti 2017-yili bashlan'ghan chong tutqunda nurghun Uyghur kadirlirini “Ikki yüzlimichilik” bilen eyiblepla qalmay, intizamgha xilapliq qilish, parixorluq qilish bilenmu eyiblep, partiye we hökümet ‍organliridin tazilap chiqarghan. Uyghur aptonom rayonluq intizam tekshürüsh we réwiziye komitéti bu ikki déloni merkezning 8 xil tüzümige xilap tipik 6 déloning qatarida élan qilghan.