Qeshqer bilen xotende ikki yuqiri derijilik Uyghur emeldar intizamigha xilapliq qilish bilen eyiblinip jazalan'ghan

Qeshqer bilen xotende ikki yuqiri derijilik Uyghur emeldar Uyghur aptonom rayonluq intizam tekshürüsh da'iriliri teripidin partiye intizamigha xilapliq qilish bilen eyiblinip jazalan'ghan.

Uyghur aptonom rayonluq intizam tekshürüsh we réwiziye komitétining ashkarilishiche, qeshqer wilayetlik tenterbiye idarisining sabiq partiye sékrétari, mu'awin idare bashliqi adil yunus bilen xoten sheherlik siyasiy kéngishining mu'awin re'isi turdimemet ghopur partiyedin qoghlap chiqirilip, wezipisidin élip tashlan'ghan, shundaqla teptish da'irilirining tekshürüp bir terep qilishigha tapshurulghan.

Mezkur komitétining torida 28-aprél élan qilin'ghan uqturushta, bu ikki emeldar merkezning sekkiz türlük belgilimisige xilapliq qilip, rahetpereslik we israpchiliq qilish bilen eyiblen'gen.

Melum bolushiche, adil yonus bilen turdimemet ghopurning délosi, Uyghur aptonom rayonluq intizam tekshürüsh we réwiziye komitétining 28-aprél élan qilghan sekkiz türlük belgilimisige xilap 6 tipik déloning bir qismi iken. Qalghan 4 déloning ürümchi, altay, qumul qatarliq jaylardiki xitay emeldarlirigha chétishliq ikenliki melum bolmaqta.

Xitayning 2017-yili 2-ayda Uyghur élide bashlighan chong basturushida Uyghur diyarining hakimiyet qatlimidiki nurghun Uyghur kadirlar “Ikki yüzlimichilik” bilen eyiblinip, tutqun qilin'ghan, qolgha élin'ghan lagér yaki türmilerge qamilip, hakimiyet qatlimidin tazilap chiqirilghan, hetta ma'arip nazaritining sabiq naziri sattar sawutqa oxshash bezi kadirlar ‍ölüm jazasigha höküm qilin'ghanidi.

Uyghur aptonom rayonluq intizam tekshürüsh we réwiziye komitéti uqturushta, adil yunus bilen turdimemet ghopurning wezipe atqurghan mezgillerde sowghat qobul qilghanliqi, shuningdek ularning yene “Bashqa qanun-intizamgha éghir xilapliq qilish mesililiri” barliqi bildürülgen. Lékin ularning konkrét qanun-intizamgha qandaq éghir xilapliq qilghanliqi tepsiliy tilgha élinmighan.