Uyghur rayonida 10 neper kadir "Qara küchler we rezillikke mudapi'e künlüki bolghan" dep tutqun qilin'ghan

Muxbirimiz erkin
2019-05-13
Élxet
Pikir
Share
Print

Uyghur rayonida keng qanat yayduruluwatqan "Qara küchler we rezillik" ke zerbe bérish herikitide 10 neper kadir "Qara küchler" ning "Mudapi'e künlüki" bolghan, dep eyiblinip, tutqun qilin'ghan.

Xitay hökümiti yil yilning bashlirida "Qara küchler we rezilik" ke zerbe bérish namida yéngi siyasi heriket qozghap, bu heriket Uyghur aptonom rayonining her qaysi yéza-qishlaqlirighiche kéngeytilgen. Mezkur heriket ijtima'iy qilmishlargha qaritilghandek qilsimu, lékin uning yerlik xelq ichidiki diniy we siyasiy xahishlargha zerbe bérishnimu öz ichige alghanliqi melum bolghan idi.

Uyghur aptonom rayonluq intizam tekshürüsh we réwiziye komitétining élan qilishiche, bu 10 kishi "Qara küchler we rezilik" ke zerbe bérish herikitide ulargha "Mudapi'e künlüki" bolghan, dep eyiblinip tutqun qilin'ghan kadirlarning ichidiki tipik 10 délo iken. Lékin, Uyghur aptonom rayonluq intizam tekshürüsh we réwiziye komitéti hazirghiche zadi qanche kadirning shu seweblik tutqun qilin'ghanliqini élan qilmighan. Xewerdin melum bolushiche, tutqunlarning az dégende 4 nepiri yerlik millet, qalghini xitay bolup, ularning hemmisi partiyedin qoghlap chiqirilghan. Shundaqla wezipisidin élip tashlinip, xitay edliye organlirining bir terep qilishigha tapshurulghan.

Melum bolushiche, nöwette Uyghur rayonining her qaysi yéza-qishlaqlirida puqralar "Qara küchler we rezillik" ke "Mudapi'e künlüki" bolghan, dep hésablighan yerlik kadirlarni pash qilishqa teshkillenmektiken. Awat nahiyesining baghtoghraq yézisi qarakürjek kenti bu heriket eng shiddetlik élip bériliwatqan kentlerning biridur. "Aqsu géziti" ning ashkarlishiche, mezkur kentte "Düshmen'ge ghezep nepret yaghdurush, hemme adem zerbe bérishtek qoyuq keypiyat shekillendürülüp, ammaqara, rezil küchlerge a'it jinayi qilmishlarni pash qilishqa seperwer qilin'ghan." lékin kishilik hoquq teshkilatlirining ilgiri sürüshiche, xitay hökümiti tekitlewatqan "Qara, rezil küchler" dégen bu söz intayin müjimel bir uqum bolup, u téximu köp kishining tutqun qilinishi, lagérlargha qamilishi yaki késilishini keltürüp chiqiridiken.

Toluq bet